Salmos 78 - Bible in Tzotzil de Chamula

Ti yabteltac Dios laj spas ta sventa slequilal ti steclumale

¹ Jteclumaltac, a'yiic ti chanubtasele, chiquin ta o ava'i ta ya'yiel ti c'usi ta xcale.

² Ta xic'opoj ta joyob c'opetic; ta xcal ti c'usi chucul ta a'yiel le' xa talel ta vo'nee.

³ Ti c'usi ca'binojtique, jna'tic xa lec, laj slo'iltabotic ca'itic ti jtot jme'tique.

⁴ Ma'uc ma' ti mu jlo'iltabetic ya'iic ti calab jnich'nabtique. Ta sventa ti ts'acal jch'ieletic ta xtale, ta jlequil-c'optatic ti Dios xchi'uque; ta jlo'iltabetic ya'iic ti smuc'ul stsatsale, ti ch'ayal ta xc'ot o'ntonal yu'une.

⁵ Ti Diose laj yac'be comel sbain Jacob ti oy c'usi jbel tsots albile; laj yalbe ya'i mantal ti Israel une, lecuc ti c'usi ta spase. Albat ya'i ti totil me'iletic, yac'beicuc sna' ti yalab xnich'nabique.

⁶ Licuc sna'ic un, ti ts'acal jch'ieletic ti ta to xtale yo' jech ta xlic sna'ic xnich'nabic ti ta xlic voq'uicuc talele. Ti stuquic ec une xchanubtasicuc to ti xnich'nabique

⁷ yo' jech spatuc yo'ntonic ta stojol ti Dios ec une, ti mu xch'ay ta yo'ntonic ti c'u s'elan laj spas talele, yo' jech ta xch'unbeic ti smantaltaque,

⁸ yo' mu jechuc spasic ec un jech c'u cha'al ti stot sme'ic ti pimunebique, ti toyobba xa'i sbaique, ti xtal xbat no'ox ti yo'ntonique, ti mu'yuc xchi'uc xch'ulel xa'i sbaique, ti jvoc' totil me'il ti mu lecuc jun sjol yo'ntonic laj ech'icuc ta stojol ti Diose.

⁹ Snitilultac ti Efraine, c'alal c'ot sc'ac'alil ti ac'-letoe, laj sutes yeic ac'o mi chapalic xa ox ta abtejebal ti chac'al yu'unic ti yolobetic xchi'uc ti sni'taque.

¹⁰ Mu'yuc laj yaq'uic ta venta ti laj spasic strate xchi'uc ti Diose, mi ja'uc laj xch'unbeic ti chanubtasel yu'une.

¹¹ Laj xch'ay ta yo'ntonic ti c'u s'elan laj spase, ti ac'bat yilic ti c'u s'elan ch'ayal ta xc'ot o'ntonal yu'une.

¹² Xi s'elan ac'bat yilic ti stot sme'ic ti ch'ayal ta xc'ot o'ntonal yu'un Dios c'alal oyic ta stuq'uil Zoán ti oy ta Egiptoe:

¹³ Laj spas ta cha'ch'ac ti nabe, ech'ic jelavel yu'un un, co'ol s'elan jun pac'bal c'ot c'alal laj spajes sba yoc ti vo' yu'une.

¹⁴ Ti ta c'ac'altique, ta st'unic batel yu'un ti toc xvolet batele; ti ta ac'ubaltic une, ta st'unic batel yu'un ti leb c'oc' xvolet batele.

¹⁵ Ti ta sbajtical banomile, laj spas ta cha'jav ti ch'ene; laj yuch'ic vo' yu'un ti bu xa c'alal xal ti yo'ntonique.

¹⁶ X'uc'ubinaj no'ox vo' loc' talel ta ch'en yu'un ti Diose.

¹⁷ Le' une, staoj yav yac'ojbeic yipal ta sa'ilan smulic ta stojol ti Diose; ti ta sbajtical banomil une, lic stoy sbaic ta stojol ti Buch'u oy ta toyole.

¹⁸ Laj slajeltsaic ta sc'anbel sve'elic ti bu xa c'alal xal ti yo'ntonique.

¹⁹ Xi lic c'opojicuc ta scontrainele: “¿Mi xu' la yu'un ta xlechan lequil ve'lil ta mexa li' ta sbajtical banomil ti Diose?

²⁰ Melel un, ti Diose, c'ot ta pasel yu'un ti laj spas ta cha'jav ti ch'ene, ti x'uc'ubinaj no'ox loc' talel ti vo'e, ti xbalaq'uin no'ox ech'el ta banomile. Le' une, ¿mi xu' yu'un ta yac'bel sve'ic ti pane? ¿mi xu' yu'un ta yac'bel sti'ic beq'uet ti steclumale?”

²¹ C'alal laj ya'i Dios ti va'i s'elan taje, lic capuc; co'ol s'elan junuc c'oc' lic tiluc ti scapemale, cap ta scontrainel ti Jacobe.

²² Mu'yuc laj spat yo'ntonic ta stojol ti Diose, mi ja'uc laj xch'unic ti ta xcoltavane.

²³ Manchuc mi jech un, ti Diose laj yalbe mantal ti toque; laj sjambe sti' ti vinajel une.

²⁴ Xvajet vulel maná yu'un ta stojol ti steclumale, trigo ti lic talel ta vinajele yo' ta sve'ic yu'un.

²⁵ Laj sve'beic span ánjeletic ti jnaclejetique. Ac'bat sve'ic yu'un Dios bu c'alal xal ti yo'ntonique.

²⁶ Ta sventa smuc'ul stsatsal ti Diose, xjumet no'ox liquel ic' lic talel ta sloq'ueb c'ac'al, lic talel ta yac'ol ti xocon sloq'ueb c'ac'ale.

²⁷ Xlamet no'ox vul beq'uet yu'un ta stojol ti steclumale, co'ol s'elan yi'al nab sbuset no'ox vul ti mutetique.

²⁸ Busul vul ta bajel yu'un Dios ti bu lamalique, ti ta joyob ti bu va'al ti yaxibal naique.

²⁹ Laj sti'ic un ti bu xa c'alal xal ti yo'ntonique; c'ot ta pasel yu'un ti Dios une, ti jech ono'ox oy ta yo'ntonique.

³⁰ Le' une, mu'yuc to ta sta lec ti yo'ntonique, naca to ta stic' ta ye ti sve'elique,

³¹ c'alal lamal c'ot ta stojolic sc'ac'al yo'nton ti Diose. Laj smil ti tsatsal viniquetic xa'i sbaique; laj chamuc yu'un un ma' ti c'ac'aquil viniquetic yu'un Israele.

³² Manchuc mi jech scotol taj une, lic sa'ilan smulic xtoc; mu'yuc xaq'uic ta venta ti ch'ayal ta xc'ot o'ntonal yu'un ti c'usitic ta spas ti Diose.

³³ Jech o xal un, jech c'u cha'al junuc jic' o'ntonal, tubbat xcuxlejalic yu'un Dios ta sventa ti mu no'ox albajuc xi'elal ti sibtasel c'ot ta stojolic une.

³⁴ Ti jech ta xilic ta xchamesatic yu'un ti Diose, va'i un, ta xlic sa'ic, ta sutic talel ta stojol, sjunul xa yo'ntonic ta sa'ic.

³⁵ Va'i un, ta svules ta yo'ntonic ti Dios oy ta toyole, ti chabiaticuque, ti pojeicuc yu'une.

³⁶ Le' une, naca jutbil c'usitic jun yutsiquil xbet'bun no'ox yeic ta yalel.

³⁷ J'ech'el mu junuc sjol yo'ntonic ta stojol, mi ja'uc xc'ot ta yo'ntonic ti lec ta xa'ibeic ti stratee.

³⁸ C'uxubinbilic yu'un ti Dios une, ch'aybil c'ot smulic ti mu'yuc xch'ulel xa'i sbaique, mu'yuc ta xtubbat ti sc'oplalique. Yepal ti mu'yuc laj yac' ta venta ti scapemal sjole, mi ja'uc suje yu'un ti scapemale.

³⁹ Ti Diose laj svules ta sjol ti naca lum ach'el no'oxe, ti co'ol s'elan jech c'u cha'al junuc ic' ts'ij xi batele, ti mu xa sut talele.

⁴⁰ Yepal no'ox laj sbaj laj stenic ti Diose; laj soquesbeic yo'nton ti ta sbajtical banomile.

⁴¹ Lic no'ox slajeltsaic; laj yaq'uic ta at-o'nton ti Ch'ul Dios yu'un ti Israele.

⁴² Mu'yuc xa laj svules ta sjolic ti oy jun c'ac'al ta sventa smuc'ul stsatsal ti Diose, pojatic c'alal tsacbilic ta c'op yu'un ti scontraique.

⁴³ C'alal oyic ta yosilal Zoan ta Egiptoe, muc'tic no'ox c'usi c'ot ta pasel ti ch'ayal ta xc'ot o'ntonal yu'une.

⁴⁴ C'alal c'ataj ta ch'ich' ti uc'umetique, ti mu xa stac' ta xuch'ic ti egipcioetique.

⁴⁵ Tacbatic talel ti jti'vanej vove, ti poc'oq'uetique, ti laj soquesan sts'ilean scotole.

⁴⁶ Ti c'ulubetique ac'bat soquesan ti slubel xchamel yoc sc'obic ti c'usitic sts'unojanique.

⁴⁷ Ta bot, ta taiv, laj lajuc ti sts'unub icuxique, ti sts'unub uvaique.

⁴⁸ Ti xvacaxique, ti xchijique, naca ta bot laj chamicuc xchi'uc ta chauc ti xc'avlajet no'oxe.

⁴⁹ Xi s'elan laj slaman talel ta stojolic ma' ti scapemal Dios une: ti sti'emale, ti j'ech'el ta stojique, ti vocolajele, ti cuxul j'ilbajinvanej ti c'usitic caj jelavem talele.

⁵⁰ J'ech'el laj scajanbe ta sbaic scotol ti sc'ac'al yo'ntone. J'ech'el laj stubbe sc'oplalic. J'ech'el yac'oj sjol sbaquilic un.

⁵¹ Ti ta Egiptoe, laj yac' iluc ti laj chamicuc ti ba ololetic yu'unic ti egipcioetique.

⁵² Co'ol s'elan chij, xlamet no'ox laj sloq'ues talel ti Israele, ti laj yic' batel ti steclumal ta sbajtical banomile.

⁵³ Ta j'ech'el lec laj sbainan talel yo' jech mu xi'ic; ti scontraic une, mut'iatic ta muc' ta nab un.

⁵⁴ Ta xch'ul teclumal stuc ti Diose, laj yic' talel ti steclumale, ta vitstic ti bu laj spoj ta u'ninele.

⁵⁵ Ti jnaclejetic yan yajvalic nacalique, ta sba ta sat ti Israele, laj stenan loq'uel. Ta jujuvoc', laj xch'ac ti banomil ti yu'unic to ox ti jnaclejetique; lic naquiicuc yu'un ta yaxibal naic un.

⁵⁶ Le' une, lic slajeltsaic ti Dios oy ta toyole; lic stoy sbaic ta stojol un. Mu xch'unbeic ti smantaltaque.

⁵⁷ Yu'un co'ol laj spasic jech c'u cha'al ti stot sme'ique; laj sjip laj stenic comel ti Diose. Mu junuc sjol yo'ntonic ta stojol; c'otic jech c'u cha'al junuc ixtol xach'obil yolob.

⁵⁸ Laj sliquesbeic sc'ac'al yo'nton ti laj sva'anic altaretic ti ma'uc c'otem ta sventae; lic snijan sbaic ta yich'el ta muc' ti c'usi meltsanbil ta c'abale, laj syanijesbeic yo'nton un.

⁵⁹ Ilin ta j'ech'el ti Dios ti c'alal yil va'i s'elan taj une; j'ech'el laj sten laj sbaj ti Israel une.

⁶⁰ Laj sten laj sjip comel ti ch'ulna meltsanbil ta nucul ti oy ta Siloe, ti bu naqui xchi'uc ti jnaclejetique.

⁶¹ Laj yac' ye sti' pojbaticuc ech'el yu'un scontraic ti caxae, ti ja' svinajeb ti yutsil slequilale, ti smuc'ul stsatsale.

⁶² Xcapet xa sjol ta j'ech'el yu'un ti steclumale; laj yac' ye sti' lajicuc ta yespada yu'un ti scontraique.

⁶³ Chic'bil chamic ta c'oc' ti jva'lej queremetique; mu'yuc xa xil ta sba ta satic un ti q'uejimoletic ta sventa slequel ti tojol tsebetique.

⁶⁴ Ti paleetique, espada ve' yu'unic; mu'yuc xa x'oq'uitaatic yu'un ti me'unal antsetique.

⁶⁵ Ti Diose, co'ol s'elan jovil vayel xbitluj liquel ti julavel c'ote, co'ol s'elan jun j'ac'-leto vinic ti julel c'ot xch'ulel c'alal lomem yu'un ti uch'ubajele.

⁶⁶ Ta xcuch yu'un stsalel ti scontrae, ti jatvil batel yu'une; sbatel osil nijil chimil xc'ot ta xq'uexlal yu'un.

⁶⁷ Bajbil tenbil c'ot yu'un sts'unubaltac ti Josee; mu'yuc xa laj st'uj snitilultac ti Efraine.

⁶⁸ Lic st'uj snitilultac ti Judae, xchi'uc ti mu tuch'baj ta yo'nton ti vits Sione.

⁶⁹ Tey lic sva'an ti xch'ulnae, jech c'u cha'al ti vinajele, ti j'ech'el laj sva'an o jech c'u cha'al ti banomile.

⁷⁰ Lic st'uj ti David ti c'ot ta yajtunele, ti jun uni jq'uel-chij to oxe.

⁷¹ Laj yicta comel yu'un ti sbainoj ta smaquel ti chije, yo' ta xc'ot jech c'u cha'al jq'uel-chij ta sventa ti Israel ti co'ol s'elan chije.

⁷² Ti David une lic xchabibe steclumal ti Diose, ti xvul ta sjol sna' c'usi xut sbae, laj xchabi, laj stojobtas, ta slequil yutsil yo'nton.