Salmos 75 - Bible in Tzotzil de Chamula

Jchapanvanej ma' ti Dios une

¹ Colaval, xacutcutic un, Ch'ul Dios, colaval, xacutcutic un. Xivocoletcutic ta aventa, xiq'uejincutic yu'un ti c'usitic jun yutsiquil apasojane.

² Ti Diose xi ta xale: “Ti yorail ta xc'ot ta t'ujel cu'une, tuc' ta jchapan scotol.

³ C'alal xnicnun no'ox ti banomil xchi'uc scotol ti jnaclejetic yu'une, ta jva'an jba ti mu xnic ti sliquebtaque.”

⁴ Xichi ta xcalbe ya'iic ti buch'u stuc xa no'ox ta xa'i sba ta banomile, xchi'uc ti buch'u mu'yuc xch'ulel xa'i sbaique: “Mu xapas ti cajal xava'i abaique, ti toyobbaoxuque.

⁵ Mu xapas abaic ti cajal xa ave ati'ic yu'un ti amuc'ul atsatsalique, mi ja'uc ti pimuneboxuc ta bet'bunel ave'ique.”

⁶ Ti coltaele mu ta xlic talel ta sloq'ueb c'ac'al, mi ja'uc ta xlic talel ta smaleb c'ac'ale, mi ja'uc ta sbajtical banomil ti oy ta yolon ti yac'ol xocon smaleb c'ac'ale.

⁷ Xi s'elan c'otem ta jchapanvanej ma' ti Dios une: ti jlome, ta xac' ta lo'il maxil, ti jlome, ta stoyesbe sc'oplal.

⁸ Ti Diose oy xa ta yoc ta sc'ob ti sbis bu ch'amal ti sc'ac'al yo'ntone, ti capal ta vino ti pasem xa ta j'ech'ele. C'alal ta sta yorail ta scocan ta malele, scotol ti buch'u mu'yuc xch'ulel xa'i sba ta banomile, scocan xa ta yeic ti slajeb sts'ubile.

⁹ Ti vu'un une, j'ech'el ta xcalbe sc'oplal Dios yu'un ti Jacobe, xchi'uc ta jq'uejintabe lametel q'uejimoletic.

¹⁰ Yu'un ta stubbe stoyobbail ti buch'u mu'yuc xch'ulel xa'i sbaique, ta xac'be yip un ti buch'u oy slequil stuq'uil yo'ntone.