Salmos 69 - Bible in Tzotzil de Chamula

Oq'uel avanel yu'un ti vocole

¹ Coltaun un, Dios Cajval, yu'un ta xa xijic'av.

² Ta xa ximut'ij yalel ta jun natil lac-lac ach'el ti mu'yuc bu jtec'anan ti cacane. Lic'ot xa ta snabil vo' ti ta xists'otun batel ti bu yich'oj yip ta x'ech' ti yoque.

³ Mu xloc' tsots ta xic'opoj ta scoj ti ep li'avane; lubtsajem xa ti jsat ta amalaele, Dios.

⁴ Yepal ta j'ech'el ti ta jech no'ox yepal xti'et ti sjolic ta jtojole, ja' mu sta yepal ti stsatsal jole; yepal ta j'ech'el ti jcontratac ti ta jech yepal ta stubbeic ya'iic ti jc'oplale. Ta stsatsal c'anic ti jsutesbeicuc ti c'usi mu'yuc quelc'anoje.

⁵ Cajval Dios, xana' c'u yepal ti jpimile; mu xu' ta jnac' ti jmul ta atojole.

⁶ Cajval Dios, ti scotol xu' avu'une, mu q'uexlaluc xc'otic ta jcoj ti buch'utic spatoj yo'ntonic ta atojole. Dios yu'un Israel, mu xyanij yo'ntonic ta jcoj ti buch'u sjunul yo'ntonic ta sa'ote.

⁷ Ta aventa cuchem cu'un ti c'usitic tsots ta xiyalbeique; mu x'ech' q'uexlaltasbil ti jba jsate.

⁸ Co'ol j'elan jyanlumun ti mu xiyojtiquinic ta spas sbaic ti jvinquileltaque.

⁹ Co'ol s'elan tilemal coc' ta x'abtej ta co'nton ta sventa ti ach'ulna ti tsots sc'oplal ta xca'ie; tenel c'ot ta jba yu'unic ti c'usiuc no'ox xloc' ta alel yu'unic ta xchopol-c'optaelote.

¹⁰ C'alal xi'oc'olet xa ta jcomtsan ti cote, ta xislabanic un;

¹¹ mi ta jlap c'u'il sventa at o'ntonale, j'ac'-tse'ejun xa yu'un scotolic.

¹² Xbet'lajan xa ye sti'ic ta yalel ti c'u j'elan ta xiyilique; sa' xa sq'uejimolic cu'un ti jyacubeletique.

¹³ Le' une, Dios, xivocolet ta atojol un. Pojun tana une, Cajval Dios. Ti mu no'ox albajuc yepal ti syail xc'uxul avo'ntone, tac'bun ti jc'opojel jti'inele. Ta sventa ti atic'oj aba ta pojvaneje, coltaun un cha'e.

¹⁴ Mu aq'uelojuc ta jt'ub jba ta ach'el xchi'uc ta snabil ti vo'e. Pojun ta yoc ta sc'ob ti buch'u xti'et sjolic ta jtojole.

¹⁵ Mu aq'uelojuc no'ox ta xisjochun ech'el yoc ti uc'ume. Mu aq'uelojuc no'ox ta sts'otun yalel bu sututet sna'bil ti uc'um ti ch'ab xichi batel yu'une.

¹⁶ Tacbun un, Cajval, oy alequil avutsil, yepal no'ox ti syail xc'uxul avo'ntone. Ta sventa ti mu tenbajun ta avo'ntone, q'uelun talel un.

¹⁷ Mu xabaj xaten ti avajtunel li'e. Ta jech yepal un, tac'bun talel, xi'bal sba ti bu oyune.

¹⁸ Nopajan talel ta jtojol, la' pojun un; pojbiluc c'otcun avu'un ta yoc ta sc'ob ti jcontrataque.

¹⁹ Xavojtiquin c'u s'elan chopol ta xi'albate, ti q'uexlal apunune, ti ilbajinbilune, ti soquesbil ti jc'oplale; xana' lec buch'utic ti jcontrataque.

²⁰ Xtuch'et xa co'nton yu'un ti contrainele; li' xa no'ox c'alal une, mu'yuc xa yipal un. Jech'e ech' jvocol ta jsa'ilan oyuc buch'u xisc'uxubinun ta smuq'uibtasel ti co'ntone.

²¹ Laj yaq'uic veneno ti ta jve'ele; c'alal taqui ti'ilun xae, laj yac'beicun cuch' jun cha'il uch'bolal.

²² Ti sba xmexaic ti oyic ta ve'el ta sventa ti co'ol yo'ntonique, c'otuc ta spets'alic un.

²³ Comicuc ta ma'satetic avu'un, xt'el-t'unuc comicuc avu'un un.

²⁴ Lamano scotol ti sc'ac'al avo'nton ta stojolique; taeicuc ta tijel yu'un ti stilemal acapemale.

²⁵ Sts'ijlajan comuc ya'iic ti yaxibal naic bu vololic ta nacleje jech c'u cha'al ti sbajtical banomile, ti mu'yucuc xa buch'u xnaqui ta yaxibal naique.

²⁶ Yu'un svolojic ta nutsel ti buch'u laj xa avilbajine; xlabajic xa ta sna'leel yu'un svocol ti buch'u laj xa ayayijese.

²⁷ Ta chopol, pacbo sutel ti c'usi chopol laj xa spasique, ti j'ech'eluc mu staic ti ch'aybil smul ta xc'ot avu'une.

²⁸ ¡J'ech'eluc, tubo sbiic ta svunal ti cuxlejale! Mu xatic'be sbiic bu tsacal sbiic ti buch'utic oy yutsil slequil yo'ntonique.

²⁹ Le' une, ti jchamel xca'i jbae, ti ilbajinbilune, va'tsanun un, Dios, coltaun un.

³⁰ Ta jlequil-c'opta ta sventa q'uejimoletic ti Dios une, ti colaval xcut ta q'uejimoletique.

³¹ J'ech'el xlaet ta xc'ot yo'nton ti Dios cu'une, ja' mu sta mi ta xcac'be ti matanal jcot milbil tot vacaxe, mi jun capon vacax ti lec bichilic ti xulube, ti lec cha'xol ti svoye.

³² Ti jech ta xvinaj taje, xlaet no'ox ta xa'iic banomil ti buch'u ilbajinbilique, xmuyubajic xa liquel yo'ntonic ti buch'utic ta sa'ic ti Diose.

³³ Ti Dios une ta xa'ibe sc'opojel ti buch'u abol sbae, mu sbaj mu sten ti yu'untac ochemic ta chuquele.

³⁴ Ti c'u avepalic oy ta vinajele, ti ta banomile, ti ta muc' ta nabe, lequil c'optaic ti Dios une.

³⁵ Ti Dios une ta stic' sba ta spojel ti jteclum Sione; ta xlic xcha'meltsan ti jteclumetic ta Judae, ta xlic naquiicuc un, ta xlic xrextoinic ti jteclume.

³⁶ J'ech'el ta sbainic yu'un xnich'nab ti yajtuneltaque; ta sventa ti buch'u mu xtuch' ta yo'ntonic ta xa'iique, j'ech'el nacal ta xcomic un.