Salmos 68 - Bible in Tzotzil de Chamula

Xvoletic batel ta tsalvanej ti israeletique

¹ C'alal ta xlic abtejuc ti Diose, tan puc no'ox ta xbat yu'un ti scontrae; ti xti'et sjolic yu'une, jatvil ta xloq'uic ta stojol un.

² Co'ol s'elan ch'ail ta sac ch'ay ta ic', jun to cera s'elan ta x'ul ta c'oc'. Ta sba ta sat Dios, ch'ayemic xa ti buch'utic mu'yuc xch'ulel xa'i sbaique.

³ Ti buch'u oy stuq'uilique xmuyubajic no'ox; ta sba ta sat ti Diose mu'yuc c'usi sna'ic ta xa'iic, xbitic no'ox ta muyubajel un.

⁴ Q'uejintaic Dios ti vo'oxuc une, q'uejintaic q'uejimoletic ta sventa; albeic yutsilal ti Buch'u xcajet ta ba toc ta xanave. Muyubajanic yu'un ti Dios une. Muyubajanic ta stojol un.

⁵ Ti Dios nacal ta xch'ulnae, c'otem ta totil yu'unic ti buch'utic mu'yuc buch'u oy yu'unique; jpojvanej c'otem yu'unic ti me'un antsetique.

⁶ Ta x'ac'bat sna yu'un Dios ti buch'u xch'ul tuque yo' jech ta xnaqui, ta stic' sba ta spojel ti jchuqueletique yo' jech ta staic ti mu'yuc c'usi sna'ique; ja'uc ti jtoyobbaetic une, co'ol s'elan mu'yuc c'usi ta smaquibe ti banomil ti bu nacalique.

⁷ Ch'ul Dios, c'alal jba'beot ech'el xchi'uc ti steclumale, ti xavoletic no'ox batel xchi'uc ta sbajtical banomile,

⁸ nic ti banomile, yal talel ti vo' ta vinajele. Ti vits Sinaie nic ta stojol Dios, ta sba ta sat Dios yu'un ti Israele.

⁹ Ch'ul Dios, yepal no'ox laj avac' ti vo'e, yo' ta xcha'ich' yip ti taquin banomil avu'une.

¹⁰ Comic ta naclej ti ateclumal bu taj une. Ch'ul Dios, ta sventa ti avutsilal une, laj avac'be ti c'usi ta xtun yu'un ti buch'u abol sbaique.

¹¹ Laj yal sc'op ma' ti Diose, yepal antsetic xi laj scaj'alique:

¹² “Jatvilic xa un ti ajvaliletic xchi'uc ti yajsoldadotaque.” Ti ta nae, xch'aquic xa ti antsetic ti c'usi laj stabeic ta pojbel ti scontraique,

¹³ nac'al lacomic ti vo'oxuc une. Le' une, yepal laj ataic loc'obbail paloma ti sts'ayts'un no'ox ta platae, ti sts'ayts'un no'ox sc'anal ta oro ti xique.

¹⁴ Ti Buch'u scotol xu' yu'une, c'alal laj sjatviltas batel ti ajvaliletic ta vits yu'un ti Salmone, sac batan no'ox ti ninal bote.

¹⁵ Muc'tic no'ox ta j'ech'el ti stselejal yu'un Basane, ti toyol ta j'ech'el ti vitsetic yu'une.

¹⁶ Ti vo'oxuc jun xa toyol vitstic xava'i abaique, ¿c'u cha'al un cha'e it'ix ta xavilic ti vits bu ta xnaqui ti Diose? Ti bu taje, j'ech'el ta xnaqui ti Diose.

¹⁷ Ti Diose, ep ta mil no'ox oy yu'un ti scarreta ta sventa ac'ob-letoe; lic talel ta vits Sinaí, vul ta ch'ulna yu'un un.

¹⁸ Ta toyol lamuy ech'el un, Ch'ul Dios, avic'ojan ech'el ta chuquel ti jchuqueletique; laj avich' ac'bel matanal yu'un ti viniquetic une. Ti jtoyobbaetique laj sbic'tajes sbaic ta atojol un, Dios.

¹⁹ Lequil-c'optabiluc ta j'ech'el ti Ajvalile, ti jcoltavanej Dios cu'untique, ti jujun c'ac'al xcuchoj li quicatstique.

²⁰ Ti Dios cu'untique, ja' jun Dios ta stic' sba ta pojvanej, ti xu' yu'un ta xpojvan loq'uel ta lajebale.

²¹ Ti Diose ta svoc'be sjol ti scontrataque, ta svoc'be sjol ec ti buch'u yac'ojbeic yipal ta spasic ti chopole.

²² Ti Diose xi laj yale: “Ta xasutic ech'el cu'un ta Basan; ta xasutic ech'el ta nab ti jun snatil ti sninabile,

²³ yo' ta xabal ta xch'ich'el avajcontra ti avacane, ti ta sleq'uic ti ats'i'taque.”

²⁴ Ch'ul Dios, Cajval, ti Ajvalilote, ti ta ach'ulnae, xvinaj ta q'uelel ti oy buch'utic xchapanoj sba xvolet talel ta spasel ti q'uin ta aventae.

²⁵ Jba'be ech'el ti jq'uejimoletique; nabalic batel ta patil ec ti jtij-vobetique; ta o'lol une, xvoletic batel ti tsebetic ta stijel ti chij-chij taq'uine.

²⁶ Acotolicuc, lequil-c'optaic ti Diose, ti c'otem ta Ajvalile. Lequil c'optaic vo'oxuc Israel ti li' vololoxuque.

²⁷ Ti j'ic'vanej ech'el ta xanvil yu'unique, ti uni its'inal Benjamine, xchi'uc yepal banquilaletic yu'un ti Judae, ti Zabulone, ti Neftalie.

²⁸ Cajval Dios, vinajeso ti amuc'ul atsatsale; cha'liqueso ti c'u s'elan laj apas to ox ta jtojolcutique.

²⁹ Ti ta stoyolal ch'ulna avu'un oy ta Jerusalene, ti bu ta xaq'uic amoton ti ajvaliletique,

³⁰ ilbo svocol ya'iic ti egipcioetique, ti co'ol s'elan jech c'u cha'al chon bolometic ti xc'alet ta pujtique, ti co'ol s'elan epal voletel tot vacax xchi'uc uni ch'in tot vacaxe, ti ic'bil yo'ntonic yu'un ti sc'ulejalique ta xac' ta lo'il maxil ti jteclume. Tan pucuc batuc avu'un ti jnaclejetic ti lec xa'iic ti letovajele.

³¹ Ta Egipto ta xtalic jva'lejetic. Ti j'etiopiaetique ta snub yoc sc'obic ta stojol ti Diose.

³² Jpas-mantaletic ta banomil, q'uejinanic ta stojol ti Diose, q'uejintaic q'uejimoletic ta stojol ti Diose,

³³ ti Buch'u xcajet ta vinajel ta xanave, ti vinajeletic sventa sbatel osile. Tsots ta j'ech'el ti sc'opojele, a'yio ava'iic c'u s'elan xvo'o'et ti sc'opojele.

³⁴ Xi s'elan ojtiquino avilic smuc'ul stsatsal ti Diose: smacoj ta sventainel scotol ti Israele, c'otem to ta yax ts'ijan vinajel ti smuc'ul stsatsale.

³⁵ Jun yutsil ta j'ech'el ti Dios ta xch'ulnae; ti Dios yu'un Israele ta xac'be yip smuc'ul stsatsal ti steclumale. Lequil-c'optabiluc ta j'ech'el ti Dios une.