Salmos 67 - Bible in Tzotzil de Chamula

Slequil-c'optaucot scotol ti jteclume

¹ Ch'ul Dios, c'uxubajuc avo'nton ta jtojolcutic, lequil va'ano aba ta jtojolcutic, lecuc xaviluncutic ta aba ta asat un,

² yo' jech scotol ti muc'tiquil jteclumetic ti oyic ta banomil une, ta xojtiquinic ti yutsil slequil avo'ntone, ti coltael avu'une.

³ Ch'ul Dios, slequil-c'optaucot ti jteclumetique; scotoluc ti jteclumetic une, slequil-c'optaucot.

⁴ Avanicuc ta muyubajel ti muc'tiquil lume, yu'un abainoj ta slequil chapanel ti jteclumetic une; abainoj ta stojobtasel ti muc'tiquil lum ta banomile.

⁵ Ch'ul Dios, slequil-c'optaucot ti jteclumetique; scotoluc ti jteclumetic une, slequil-c'optaucot.

⁶ Satin xa ti oy c'usi ts'unbil ta banomile; ti Dios cu'untic une laj sva'an sba ta jtojoltic.

⁷ Sva'anojuc sba ta jtojoltic ti Dios une. Scotoluc banomil, snijanuc xchimanuc sbaic ta stojol.