Salmos 64 - Bible in Tzotzil de Chamula

C'opojel ti'inel ta sc'anel pojel ta stojol ti Diose

¹ Cajval Dios, a'yibun ti jc'op ta jc'an parte ta atojolale; mu xavac' ta tuch'el jcuxlej ti xi'bal sba ta j'ech'el ti jcontrae.

² Pojun ta yoc ta sc'ob ti buch'u mu'yuc xch'ulel xa'i sbaic ti oy c'usi snopojic ta mucule; pojun loq'uel ta stojol ti spayoj xa sc'opic ti buch'u mu'yuc xch'ulel xa'i sbaique,

³ ti co'ol s'elan juxbil espadae, mi sni' yolob, xvajet no'ox yu'unic ta yalel ta xbet'bunel yeic ti oy svenenoale.

⁴ Xvajet yeic ta scontrainel ti buch'u ch'abal smule; ta mucul xvajet no'ox ti yeique, ti mu jutucuc ta xi'ique.

⁵ Xac'be xa sba yip yo'ntonic ta spasel ti chopole, ti snopojic xa ta xaq'uic pets' ta mucule. Ta snopic ti mu'yuc ilbilique,

⁶ ti mu'yuc buch'u ta st'un yalojic ti c'usi chopol ta spasique. Le' une, ti Buch'u xojtiquin c'usi ta snop ta yut yo'nton ti vinique, ta xlic st'unel un.

⁷ Ta xyayijesatic ta sventa syolobtac ti Diose, ti ch'ayal yo'ntonic ta xyayijesatique.

⁸ Ta sc'op no'ox stuquic un ta xlic yalicuc ta lum, ti buch'u ta x'ileic yu'une, ta xlabajic xa.

⁹ Scotolic ta xlic xi'taic ti Diose; ta xlic yalbeic sc'oplal ti yabtele; ta sjolinic ti c'usi laj spas une.

¹⁰ Ti buch'u oy stuq'uil yutsil yo'ntone, xmuyubaj no'ox ta stojol ti Diose, sa' xa spojel ta stojol un, scotol ti buch'u stuc'ulanoj sbae, mu xa c'usi sna' ta xa'iic.