Salmos 61 - Bible in Tzotzil de Chamula

Patob o'ntonal c'otem ma' ti Dios ta chabivaneje

¹ Cajval Dios, a'yibun jc'op ti xi'avet yu'un yipal xc'uxul ta xca'ie, chiquintabun ti jc'opojel jti'inel une.

² Ta jujuti' ti bu xa oy ti banomile, xivocolet ta atojol, yu'un juteb xa tsacal ti co'nton ta xca'ie. Va'anun ta jun toyol vits ti bu pojbil ta xic'ot avu'une,

³ yu'un c'otemot ta jnac'obbail. Co'ol a'elan c'otemot ta jun natil tsatsal luchlebal ti mu xitae ta tsaquel yu'un ti jcontrae.

⁴ Jc'anuc naclucun o ta ana sbatel osil, ti chabibilucun ta yolon aqueoval avaxinale.

⁵ C'ot ta ani' achiquin un, Dios, ti oy c'usi caloj ta xcaq'ue, laj quich' ti jrexto ti ta xavac'be ti buch'utic ta xayich'ic ta muq'ue.

⁶ Jalijuc xch'iel sc'opojel ti ajvalil avu'une; ch'iuc avu'un, yepaluc sjabilal yiluc batel.

⁷ Sbateluc osil ajvaliluc o ta sventa ti va'alot teq'uelot ta stojole, tuc'ulano ta sventa syail xc'uxul avo'nton, xchi'uc ti slequilal avo'ntone.

⁸ Jech sbatel osil xilequil-c'opoj ono'ox ta aventa unbi; ta xc'ot ta pasel cu'un ec un jujun c'ac'al ti c'usi laj cal ta jamal ta xcaq'ue.