Salmos 58 - Bible in Tzotzil de Chamula

Vocolajel ta sc'anel ti chapanele

¹ Ti vo'oxuc cajal xava'i abaique, ¿mi stuq'uil xana' ti jbel xa ac'op loc' ta alel avu'un ti c'u s'elan c'ot ta chapele, ti lequil chapanvanej laj apas xana' un?

² Ma'uc ma' le' une, c'ajomal no'ox laj apas ta sc'ac'al avo'nton, ti ta xcontrainvanic liquel ti jteclum avu'une.

³ Ti buch'u mu'yuc xch'ulel xa'i sbaique, soquem xa ono'ox c'alal chi'inbilique; ti jutc'opetic une, yan be xa ono'ox stamoj talel c'alal mu to ta xvoq'uique.

⁴ Naca jmilvanej chon, co'ol s'elan jti'oval chon ti oy svenenoale, ti ta sbis xa sba ta cocorixe, ti ta smac ti xchiquinique,

⁵ yo' jech mu xa'ibe ta stij musica ti buch'u xtojob lec ta yalubtasele.

⁶ Cajval Dios, c'asbo ya'iic stanal ye un. Cajval, c'asbo sts'uts'op ti co'ol s'elan leonetic taje.

⁷ Sac ch'ayuc batel jech c'u cha'al vo' ta xbeine; taqui lajicuc ta j'ech'el jech c'u cha'al ti momol oy ta ti' bee.

⁸ Tubuc ta be sc'oplalic jech c'u cha'al ta sac ch'ay svavox ti t'ote, jech c'u cha'al junuc jyalel olol ti mu'yuc xil o ti saquilal osile.

⁹ C'aq'uemicuc xa'iic jech c'u cha'al junuc tomal ch'ixe; ta sc'ac'aluc o'ntonal, yich'uc bulel loq'uel ya'iic jech c'u cha'al ti yaxal momole.

¹⁰ Ti laj yil ti pacbat xa sutel sc'oplal ti buch'u jun yo'ntone, xmuyubaj xa liquel un; sbal xa ta ch'ich' yacan ta xch'ich'el ti buch'u mu'yuc xch'ulel xa'i sbaique.

¹¹ Va'i unbi, xi ta xalbe sbae: “Xloc' venta ma' ti jun jol co'ntone. Oy Dios ta xchapanel ti jnaclejetic ta banomile.”