Salmos 54 - Bible in Tzotzil de Chamula

C'opojel ti'inel ta sc'anel coltael ta stojol ti Diose

¹ Ta aventauc un, Ch'ul Dios, ti c'otcun ta pojel avu'un une, pojbiluc c'otcun yu'un ti amuc'ul atsatsal une.

² Chiquinta ava'i ti jc'opojel jti'inel une, Dios, ts'eteluc ani' achiquin yu'un ti jc'ope.

³ Yu'un oy toyobba, jbelic ta c'op, lic xa scontrainicun, ta xismilic ya'iic. Mi jutebuc oy ta yo'ntonic ti Diose.

⁴ Manchuc mi jech le' une, ti Diose ta stic' sba ta spojelun; sva'anoj to sba ti Diose ti jech to li' cuxulune.

⁵ Ta xjoybinbat sutel ta sba stuquic ti c'usi mu stac' alel ta spasic ti jcontrataque. Ti oy avutsil alequil une, Dios, tsutseso ya'iic ta j'ech'el.

⁶ Ta yutsil co'nton ta xcac'bot milbil matanaletic; ta jlequil-c'optaot un, yu'un oy alequil avutsil.

⁷ Laj atic' aba ta spojelun ti bu mu xnel x'ech' scotol ti jvocole, laj quil ta jba ta jsat tsalbil c'otic ti jcontrataque.