Salmos 53 - Bible in Tzotzil de Chamula

Ti ch'ayem snopobil xchi'uc ti jelavem xchopolale

¹ Ti buch'u pimuneb xa'i sbaique xi ta snopique: “Ch'abal ma' ti Diose.” Scotol ch'ay snopbenal yu'unic, lic spasic ti c'usi ta sc'an ti xchopolalique, mi junuc ti oy c'usi lec ta spasique.

² Ti Diose, ta vinajel to, ta sq'uel talel yo' ta xvinaj mi oy buch'u xa'ibe xchiquinal, mi oy to buch'u ta sa' ti Diose.

³ Le' une, scotolic laj xa stamic yan be; scotolic ch'ay snopbenal yu'unic. Mi junuc ta spas ti c'usi leque, mi junuc ta j'ech'el un.

⁴ Ti jchopol joletic ti mu sna' sc'anic vocol ta stojol ti Diose, ti mu xa'ibeic sni' xchiquinale, jxumel no'ox ta yeic ta slajesic ti jteclumal jech c'u cha'al ti buch'u xjumel no'ox ta xac'be ti pane.

⁵ Ti bu taje, ac'o mi ch'abal sc'oplal ti xi'el ta stojolique, yu'un ti Diose ta stsutses ti jcontrainvaneje. Lo'il maxiltabil ta xc'otic, bajbil tenbilic xa yu'un ti Dios une.

⁶ Oc la ta alel le'uc ta vits Sión taluc scoltael ti Israele. C'alal ta sjel Dios ti c'usi q'uelel ta stojol ti slumale, xmuyubajic liquel snitilultac ti Jacobe, scotol ma' ti jteclum Israele.