Salmos 52 - Bible in Tzotzil de Chamula

Altic ma' ti xcajet xa xa'i sba ti buch'u mu'yuc xch'ulel xa'i sbaique

¹ ¿C'u cha'al ta yip no'ox achopolal ti ech'em yeilal avu'un ti uni caj tsacal xava'i abae? Ti syail xc'uxul yo'nton ti Diose, mu'yuc spajeb.

² Yacalot no'ox ta snopel ti c'usi chopole, xbet'bun no'ox yeilal avu'un ta spayel ti c'ope, co'ol xve'baj jech c'u cha'al junuc cuchilu ti juxbil lec yee.

³ Lec xa xava'i ta spasel ti c'usi chopole, ma'uc ti c'usi leque; lec xa xava'i ta sjutel ti c'ope, ma'uc ti melele.

⁴ Uni bet'an, lec xa xava'i xasoquesvan xchi'uc ti ac'ope.

⁵ Le' une, j'ech'el xi s'elan ta xac'ot ta tsutsel yu'un ti Diose: ta squilot loq'uel ta ana ac'uleb, ts'ij xi ac'oplal yu'un ta banomil.

⁶ Ti buch'u ta xch'un ti c'u s'elan ta sc'an ti Diose, ta xil ta satic ti va'i s'elan taje, ta xlic xi'icuc un; le' une, xi s'elan ta xalic ta slabanel ti buch'u taje:

⁷ “Vi to la s'elan c'ot ta stojol un ti buch'u mu sa' spojel ta stojol ti Diose, ti spatoj yo'nton yu'un yepal ti sc'ulejale, ti yac'ojbe yipal xchi'uc ti xchopolale.”

⁸ Ti vu'une, co'ol j'elan yaxal olivo te' teq'uel ta xch'ulna ti Diose; j'ech'el jpatoj co'nton ta sventa ti syail xc'uxul yo'ntone.

⁹ Colaval xacutot ono'ox, Ch'ul Dios, ta sventa ti c'u s'elan laj apase, ta jmalaot un ta sba ta satic ti buch'u jun yo'ntonic ta atojole, yu'un oy alequil avutsil.