Salmos 51 - Bible in Tzotzil de Chamula

C'uxubajan cu'un un, Ch'ul Dios

¹ Ta sventa ti syail xc'uxul avo'ntone, Ch'ul Dios, c'uxubajan cu'un un; ta sventa ti mu albajuc yutsil slequil avo'ntone, tubbun ti jmule.

² Meso tuso loq'uel ti jchopolale. Meso tuso loq'uel ti mulil oy ta jtojolale.

³ Quiloj ti toyobba xca'i jba une, ti mu cha'bel xch'ay ta co'nton ti jmule.

⁴ Laj jsa' jmul ta atojol, ja' no'ox ta atojol laj xa jsa' jmul un; laj xa jpasilan chopol ti albil sc'oplal ta xavac'be stojole. Ti chapanel ti loc' ta alel avu'une, oy stuq'uil ta j'ech'el, mi ja'uc yamal sc'oplal ti c'u s'elan c'ot ta nopel avu'une.

⁵ Melel un, quich'oj xa ono'ox jchopolil c'alal livoq'ue; oyun xa ono'ox ta mulil ti chi'inbilun yu'un ti jme'e.

⁶ Melel un, mu tuch'baj ta avo'nton ti buch'u jamal yo'nton ta atojole, ta yutil to co'nton laj abijubtasun.

⁷ Mesun tusun ta hisopo te', mesbil ta xic'ot unbi; pocun un, x'ech'uc to sac lapanel ta xicom jech c'u cha'al ti bote.

⁸ Jtauc to avu'un yepal ti mu'yuc c'usi jna'e, ti smuyubajel co'ntone; muyubajcun ta ach' avu'un, manchuc mi laj xa avac'bun ti jvocol une.

⁹ Mu xa xavac' asat ta sq'uelel ti jmule, tubo ta j'ech'el scotol ti jchopolale.

¹⁰ Mesbiluc tusbiluc ti co'nton avu'une, Ch'ul Dios, junuc yutsil ach'ubuc avu'un ti snopbenal cu'une.

¹¹ Mu xaq'uejun loq'uel ta atojol, mi ja'uc xatam loq'uel ta jtojol ti ach'ul cuxlejale.

¹² Licuc ca'i ta ach' ti muyubajel ta sventa ti coltael avu'une, tamun japun ta sventa yutsilal ti ach'ul cuxlejale.

¹³ Ti bu lec ta xavile, ta xcac'be sna'ic ta stamel ech'el ti jtoyobbaetique, xchi'uc ti suticuc talel ta atojol ti jsa'muliletique.

¹⁴ Mu aq'uelojuc un, Ch'ul Dios, ta syalesel ti coc jc'obe, ti jcoltavanejot cu'une, Ch'ul Dios, ta jvinajes ac'oplal ta q'uejimoletic ti oy atuq'uil avutsile.

¹⁵ Jambun ti que jti' une, Dios, ti laetcun xa ta q'uejimol ta slequil-c'optaelote.

¹⁶ Ti vo'ot une, mu xac'an ti milbil matanale, mi ja'uc ti chic'bil matanaletique. Ta xcac'bot ma' ti jechuc une, le' une, mu lecuc xavil un.

¹⁷ Ti matanal ti lec ta xa'i ti Dios ti ta xc'ot ta stojole, ja' ti buch'u mu xa xnel x'ech' ta xa'i yu'un ti smul laj stae; le' une, Ch'ul Dios, mu xaten mu xabaj ti buch'u juteb xa tsacal ta xa'i ti yo'nton une.

¹⁸ Lecuc c'otuc ta stojol avu'un ti Sión ta sventa yutsilal avo'ntone; liqueso ta ach' smocaltac ti Jerusalene.

¹⁹ Va'i unbi, ta xlic atsac ti milbil matanaletique, ti chic'bil matanale jech c'u cha'al albil sc'oplal ono'oxe, ta xlic yich' aq'uel ti ch'in vacaxetic ta sba ti avaltar une.