Salmos 48 - Bible in Tzotzil de Chamula

Yutsilal Sión steclumal ti Diose

¹ Jelavem smuc'ul ma' ti Dios une, sc'otebal o ti lequil c'optabiluc ti Dios cu'untic ta steclumale, xchi'uc ti ta ch'ul vits yu'une.

² Jun yutsil staylej vits ti Sione, steclumal ti muc'ul Ajvalile, ti oy ta yolon ti yolon xocon sloq'ueb c'ac'ale. Smuyubajel scotol ti banomile, steclumal ti muc'ul Ajvalile.

³ Ti Diose sventainojan ti pasob mantal naetic ta Jerusalene; laj yac' sba ta ojtiquinel ti c'otem ta jpojobbail stuc ti Diose.

⁴ Ti ajvaliletique jmoj laj stsob sbaic, ti jmoj xvoletic batel ta scontrainele.

⁵ C'alal laj yilic ti jteclume, ch'ayal c'ot yo'ntonic yu'un, mu xa stac' a'yeluc ta xa'iic c'usi ta spasic, jatavic batel.

⁶ Xi s'elan u'ninatic yu'un ti xi'el ta j'ech'ele: xbaletic xa liquel yu'un ti xc'uxule, co'ol s'elan junuc ants ti liquem xc'uxul xch'ut ta svoq'uesel ti yole,

⁷ jech c'u cha'al junuc ic' liquem talel ta sloq'ueb c'ac'al ti laj javuc yu'un ti barcoetic yu'un ti Tarsise.

⁸ Laj quil ta jba ta jsatcutic ta steclumal Dios cu'untic ti Ajvalil jelavem xu' yu'une, co'ol jech c'u cha'al ti xi ono'ox albiluncutique: j'ech'el mu xch'aybe sc'oplal Jerusalén ti Diose.

⁹ Ta o'lol ti ach'ulnae, Ch'ul Dios, ta jvules ta jolcutic yepal ti syail xc'uxul avo'ntone.

¹⁰ Lequil c'optabilot ta sjunul banomil un, Ch'ul Dios, jech c'u cha'al albil ac'oplale. Ta sventa amuc'ul atsatsal, tal ti pojel colele.

¹¹ Laetuc no'ox ya'i ti vits Sione; biticuc ta muyubajel ti jteclumetic yu'un ti Judae, ta sventa ti lec ta xc'ot ta chapel avu'une.

¹² Joyobtaic ta xaniel ti Sione, chapic c'u yepal oy ti q'uelob osiletic yu'une.

¹³ Tuc'ulano avilic lec ti smocale, xchi'uc ti pasob mantal naetic yu'une, yo' jech xalo'iltabeic ya'iic ti ts'acal jch'iel jc'opojeletique,

¹⁴ ti sbatel osil jech o no'ox stalel ta spasilan ti Dios cu'untique. Jtojobtasvanej cu'untic sbatel osil.