Salmos 47 - Bible in Tzotzil de Chamula

Ajvalil yu'un scotol banomil ma' ti Dios une

¹ Acotolic jteclumetic, t'axo ac'obic. Albeic yutsilal ti Diose, avananic ta muyubajel.

² Ti Dios ti oy ta toyol cajale, xi'bal sba ta j'ech'el, c'otem ta banquilal Ajvalil yu'un scotol ti banomile.

³ Laj slilin ta j'ech'el ti jteclumetique, xchi'uc ti muc'tiquil lume, ti mu'yuc xa c'usi xut spoj sbaic yu'un ta jtojoltique.

⁴ Laj xch'acbotic jrexto banomiltic, ti stuc xa no'ox jech c'ot xchi'uc laj ya'i ti Jacob ti buch'u c'uxubinbil c'ot yu'une.

⁵ X'avlajetic no'ox ta muyubajel, xtutet no'ox ti oq'uesetique c'alal muy batel ta spasob mantal ti Ajvalil Diose.

⁶ Q'uejintaic, q'uejintaic xa q'uejimol ta sventa ti Dios une, q'uejintaic, q'uejintaic xa q'uejimol ta sventa ti Ajvalil cu'untique.

⁷ Q'uejintaic nichimal q'uejoj ta sventa ti Diose, yu'un c'otem ta Ajvalil yu'un scotol banomil.

⁸ Ti Diose c'otem ta Ajvalil yu'un ti muc'tiquil lume, chotol ta xch'ul spasob mantal ma' ti Dios une.

⁹ Ti viniquetic ti tsots ich'bil ye sti'ic ta muc'tiquil jteclume, jun ta svol sbaic xchi'uc steclumaltac ti Diose, Dios yu'un ti Abrahame.

¹⁰ Ta sventa ti Diose, oy j'abteletic li' ta banomile. C'otem ta sventa scotol.