Salmos 46 - Bible in Tzotzil de Chamula

Li' oy ta jtojoltic ti Diose

¹ Jnac'obbailtic, yip co'ntontic ma' ti Diose; jcoltavanej cu'untic c'alal yorail ti ilbajinele.

² Jech o xal un, mu xijxi'otic, manchuc mi ta xjav ti banomile, manchuc mi ta xmut'ij ta nab ti vitsetique,

³ mi xyuc'uq'uet no'ox ta j'ech'el ti nabe, mi natic no'ox ta xvil muyel ti syuc'benale, mi xnicnun no'ox yu'un ti te'tic ta scoj ti scapemale, mu xijxi'otic yu'un.

⁴ Ta sventa ti tan puc yoctac ti muc' ta uc'ume, ta staic smuyubajel yo'ntonic Steclumal ti Diose, ja' ti ch'ul jteclum yu'un ti Buch'u oy ta toyole.

⁵ Yu'un sva'anoj sba ta o'lol ti Diose, ti staoj yav va'ale; ta xcoltaatic yu'un Dios c'alal ta sacub talel ti osile.

⁶ C'alal ta svinajes sc'opojel ti Diose, xc'ulet no'ox ta xjav ech'el ti banomile, x'avlajanic no'ox ti muc'tiquil lumetique, xniclajanic no'ox ta xi'el ti jpas-mantaletique.

⁷ Li' oy ta jtojoltic ma' ti Dios ti scotol xu' yu'une; ti Dios yu'un ti Jacobe c'otem ta jnac'obbailtic.

⁸ La' q'uelo avil ti xi s'elan labal sba c'ot ta pasel yu'un Dios ti li' ta banomile:

⁹ c'ot xa ta tsutsel yu'un letovajel ti bu xa oy jujuti' ti banomile, c'as xa yu'un ti syolobique, lilij xa yu'un ti lanzaetique, laj xa spajbe sc'ac'al ti carretaetic sventa ac'ob-letoe.

¹⁰ “Pajeso abaic, ch'an xa chanic, c'otuc ta avo'nton ti vu'un Diosune. Cajal jc'oplal c'otem ta stojol ti muc'tiquil lumetique. Jbainoj scotol ma' ti sba banomile.”

¹¹ Li' oy ta jtojoltic ma' ti Dios ti scotol xu' yu'une. Dios yu'un ti Jacobe c'otem ta jnac'obbailtic.