Salmos 45 - Bible in Tzotzil de Chamula

Sq'uejimolal sventa nupunel yu'un ti ajvalile

¹ Chajel no'ox nichimal c'opetic yu'un ti jol co'ntone; ti que jti'e c'otem jech c'u cha'al ti c'usi ta sts'ibaj o ti jun jts'ibajom ti xluchbe no'ox batele. Ta xcal ta stojol ajvalil ti nichimal ti c'op oy ta que ta jti'e.

² Ta scotol ti viniquetique, atuc no'ox ti ac'otebal c'upil aba ta j'ech'ele. C'otel ta o'ntonal yutsil ti c'usitic ta xloc' ta ave ta ati'e. Jech o xal j'ech'el laj sva'an sba ti Dios ta atojolale.

³ Tsatsal vinic, chuquino xch'a ti avespadae. Tixil to ta xac'ot xchi'uc.

⁴ C'otem ta alequilal avutsilal ti avac'ojbe yipal ta spojel ti melele, ti atic'oj aba ta spojel ta xchapanel ti me'un mu'nate. Muc'tic no'ox ma' ti c'usi ta xc'ot ta pasel yu'un ti avoc ac'obe.

⁵ Ta sventa ti ts'apal ta xc'ot ta yo'ntonic acontratac ti ts'ubajtic sni'tac ti ayolobtaque, jech o xal un, ajvalil, naca xyal no'ox ta lum ta avoc ta ac'ob ti jteclumetique.

⁶ Ti ventainel avu'une, Ch'ul Dios, sbatel osil, ti naca lequilal tuq'uilale.

⁷ Oy ono'ox ta avo'nton ti c'usi leque, acontrainoj ti c'usi chopole. Jech o xal laj st'ujot ti Diose, ti Dios avu'une, yepal no'ox laj yac'bot ti smuyubajel avo'ntone, ja' mu sta ac'bat ti achi'iltaque.

⁸ Sjunul ti ac'u'e yich'oj muil poxiletic, jchop o ta muil poxil ti sbiinoj aloe, ti mirrae xchi'uc ti canelae; ta xac' smuyubajel avo'nton ti xlomet no'ox ta stijic vob ta ana ti bu pasob mantaletic avu'un ti pac'bil ta saquil baxtone.

⁹ Ta scotol ti c'u yepal ti antsetic ti oy ta atojole, oy ta atojol ec un stsebtac ti ajvaliletique; ta xocon ti bu chotol ta xaventainvane, nabal ta atojol un ti me' ajvalil avu'un ti xch'alet no'ox yutsil xchi'uc ti bats'i oroe.

¹⁰ Ts'etano achiquin ta ya'yiel, tuc'ulano ava'i lec ti xi s'elan ta xcalbot ava'ie, jtseb: tuch'o ta avo'nton ti atot ame'e, xchi'uc ti ateclumale.

¹¹ Ti ajvalile ic'bil yo'nton ti xtixet no'ox avutsil ta q'uelele, c'otem ta avajval, tsots sc'oplal ch'unbo ti sc'ope.

¹² Ta xtalic ec un stsebtac ti ajvalil ta Tiroe, ti ep sc'ulejal ta j'ech'el ta jteclume, ti ta smatantasic ti bu xa c'alal xu' yu'unique yo' ta staic ti lec x'ilatic avu'une.

¹³ Ta xa x'och talel ti tseb ti buch'u ta xc'ot ta me' ajvalile, ti xtixet no'ox xchi'uc ti yutsilale, ti capal jalbil ta oro ti sc'u'e.

¹⁴ Xch'alet no'ox yutsil sc'u' lapbil talel ti ic'bil ta xbat ta stojol ti ajvalile, tijilic talel ec ta spat ti yan tojol tsebetic sventa yich'el ta muq'ue, ti jtic'vanejetic ta na yu'un ti lec xil sbaic xchi'uque.

¹⁵ Xmuyubajic no'ox stsobetic ochel; mu'yuc c'usi sna'ic ta j'ech'el ta x'ochic batel ta sna ti ajvalile.

¹⁶ Ti anich'nabtaque, ajvalil, ta xlic sbainic ta sventainel bu chotiic ta spasel mantal ti amolmuc'totaque, ta xc'ot ta pasel avu'un un ta sventainel scotol ti muc' ta lume.

¹⁷ Ta jventain un ti mu xch'ay ta o'ntonal ta yich'el ta muc' ac'oplal ta sventa ti jujuchop ta x'ech'ique, ti staojuc yav ta slequil-c'optaot sbatel osil ti jteclumetique.