Salmos 42 - Bible in Tzotzil de Chamula

LIBRO II (Salmos 42—72 ) Ti spatobil co'ntone oy ta stojol ti Diose

¹ Ti c'u s'elan ta sa' vo' yuch' ta uc'um ti te'tical chij ti c'alal ta xa'i taqui ti'ile, jechun ec un, Dios, ta jsa'ot.

² Taqui bilan que ta sa'elot ti j'ac'-cuxlejal Diosote. ¿C'usi to ora ta jva'an jba liquel ta stojol ti Dios une?

³ C'ac'al ac'ubal, c'otem ta jve'el ma' ti oq'uel avanele, ti xi ta xisjac'beicun scotol c'ac'ale: “¿Bu oy ti Dios avu'une?”

⁴ C'alal ta xlic jnopilan taje, ta xlic jmil jba ta oq'uel yu'un ti jvocole. Ta xvul ta jol ti xivolet batel xchi'uc ti yane, ti mu'yuc c'usi jna'cutic xi'avlajetcutic ta muyubajel ti jvolojic batel ta xch'ulna ti Diose. Mu albajuc ma' ti muc'ul q'uin ta xc'ot ta pasele.

⁵ ¿C'u cha'al ta jip ta jten jba ya'luc un? ¿C'u cha'al ti oyun ta vul o'nton xchi'uc une? Ti jpatoj co'nton ta jtae, laj xa cac'be sbain ti Diose, ti staoj yav oy sq'uejintael cu'une. Ja' Dios, jcoltavanej cu'un.

⁶ Jipoj jtenoj jba ya'luc ma' ti xavale. Jech o xal un, ep ta jvulesot ta co'nton ti oyun ta yosilal uc'um Jordane, ti ta vitstic Hermone, ti ta Mizare.

⁷ Co'ol s'elan yech'omal uc'um xvinaj xchajet ta xyal talel ta lican ch'entic ti xbalaq'uin no'ox ech' ta jtojol avu'une.

⁸ Ti ta c'ac'altique, ta xvul ta jtojol syail xc'uxul yo'nton ti Diose; ja' jech ta ac'ubaltic xtoque, mi jliqueluc ta jquechan jba ta sq'uejintael ta sc'oponel sti'inel ti Dios sventainoj ti jcuxleje.

⁹ Xichi ta xcalbe ti jpojvanej Dios cu'une: “¿C'u cha'al laj ach'ayun ta avo'nton un? ¿C'u cha'al oyun ta at-o'nton ti bu yalel muyelune, ti ilbajinbilun yu'un ti jcontrataque?”

¹⁰ Coquijem xa jbaquiltac ta scoj ilbajinel yu'un ti jcontrataque, ti xi ta sjac'beicun scotol c'ac'ale: “¿Bu oy ti Dios avu'une?”

¹¹ ¿C'u cha'al ta jip ta jten jba ya'luc un? ¿C'u cha'al ti oyun ta vul o'nton xchi'uc une? Ti jpatoj co'nton ta jtae, laj xa cac'be sbain ti Diose, ti staoj yav oy sq'uejintael cu'une. Ja' Dios, jcoltavanej cu'un.