Salmos 40 - Bible in Tzotzil de Chamula

Ximuyubaj no'ox ta spasel ti c'usi oy ta avo'ntone, Dios

¹ Laj jpat co'nton ta stojol ti Diose, laj sts'etan sni' xchiquin ta ya'yiel ti xi'oc' xi'avane,

² laj xchechun loq'uel ta ch'en ti bu lajebal xal oe, laj sloq'uesun ta ts'aj-ts'aj ach'el ti bu ta xa ximut'ij yalele, laj stec'anbun lec coc ta jun ton, lec xiva'vun ti bu ta jtec' batel yu'une.

³ Xiq'uejin no'ox liquel ta jun ach' q'uejimol, ta sq'uejintael slequil c'optael ti Dios cu'untique. Ti jech laj yilic taje, yepalic lic stij yo'ntonic ta yich'el ta muc', lic spat yo'ntonic ta stojol ti Dios une.

⁴ Mu'yuc c'usi sna'ic ta j'ech'el ti buch'u ta spat yo'nton ta stojol ti Diose, ti ma'uc ta xbat snaban sba ta stojolic ti buch'utic pimunebique, mi ja'uc ta stojolic ti buch'utic nijil chimilic ta yich'el ta muc' ti loc'obbail diosetique.

⁵ Cajval, Ch'ul Dios, yepal no'ox laj apas ti ch'ayal ta xc'ot o'ntonal yu'une, ti oyuncutic to ta avo'ntone. Mu'yuc buch'u xco'olaj jech c'u cha'al ti vo'ot une. Jc'anuc xa ca'i ta scaj'alel ti xivulvun xa xchi'uc ta yalbel ti sc'oplale, ti xi no'ox yuni epal ma' ti x'al cu'une.

⁶ Mu xlaetuc avo'nton yu'un ti milbil matanal ta xa'ac'bate, mi ja'uc ti matanal sat ts'unubile, mi ja'uc laj ac'an ti chic'bil matanale, mi ja'uc ti matanal ch'ayob mulile. Le' une, laj ajambun ti jni' jchiquine.

⁷ Jech o xal xichie: Li' oyune, jech c'u cha'al ta xal ti jc'oplal ta jpoc vune.

⁸ Ximuyubaj ta spasel ti c'usi oy ta avo'ntone, Dios; c'otem ta co'nton ti c'u s'elan lachanubtasvane.

⁹ Ta sba ta sat ti mu albajuc yepal ti ateclumale, laj cac'be sna'ic ti c'usi lec ta pasele. Xana' lec un, Dios, ti mu ts'ijiluc licome.

¹⁰ Ma'uc ma' ti ts'ij xichi ta yalbel sc'oplal ti lequil chapanel avu'une; laj calbe sc'oplal ti stuq'uil avo'ntone, ti colel ta aventae. Ti syail xc'uxul avo'ntone, ti melel xavale, j'ech'el mu'yuc laj jmuc ta stojolic ti mu albajuc yepal ti ateclumale.

¹¹ Mu xajaltabun, Dios, ti c'uxubinel avu'une. Chabibilucun o yu'un ti syail xc'uxul avo'ntone, ti melel xavale.

¹² Yepal xa vul ta jtojol ti vocoletique, ti mu xa xchapetuc cu'une. Laj yilbajinun ti jmul laj jpase, ti c'ot ta maquel ti jsat yu'une; x'ech' to yepal ta j'ech'el un, ja' mu sta ti c'u yepal oy ti stsotsil jole, lic'ot ta lubtsajel xchi'uc ta j'ech'el.

¹³ Avocoluc, Dios, la' coltaun, la', tic'o aba ta jpojel ta anil un, Dios.

¹⁴ Q'uexlaltasbiluc c'oticuc ta j'ech'el ti buch'u ta stsutsesicun ya'iique. Q'uexlaluc xa, jatavicuc batel ti buch'utic ta xiyilbajin ya'iique.

¹⁵ Q'uexlaluc xa, jatavicuc batel ti buch'utic ta xislabanique.

¹⁶ Scotolic ti buch'u ta sa'ote, epajuc ti smuyubajel yo'ntonique; ti c'u yepal juteb ta yo'ntonic ta sc'anic coltael avu'une, xi ac'o yalique: “Jelavem smuc'ul stsatsal ma' ti Dios une.”

¹⁷ Ti jech me'un mu'natune, ti q'uelel ti vocol ta jtojole, mu xach'ayun ta avo'nton un, Dios. Ti vo'ot ta xacoltaune, ta xic'ot ta colel avu'un, mu xajalij un, Dios.