Salmos 39 - Bible in Tzotzil de Chamula

Xi no'ox yuni natil ti cuxleje

¹ Laj calbe jba ti ta jtuc'ulan jbae, ti mu jta jmul yu'un ti quee, ti ta jpajes que jti' ti oyic ta jtojol ti buch'u mu'yuc xch'ulel xa'i sbaique.

² Xi s'elan laj jpas jba ta uma'e: ts'ij xichi, mu'yuc c'usi laj cal. Mi ja'uc ta yalbel sc'oplal ti c'usi leque. Le' une, yantic xa xich' yip ta j'ech'el ti yipal xc'uxul ta jtojole,

³ ta xtil ta j'ech'el ti co'ntone. Laj jnop un, ti jun xa c'oc' lic tiluc ta jtojole, ti xi laj cal ti tsots li'avane:

⁴ “Ac'bun jna', Dios, bu c'ac'al ta xic'ot ta tsutsel, c'u to sjalil ti li' xvic'vun ti jsat quelove, ta jc'an ta jna' c'u xa sjalil cuxulun.

⁵ Xi no'ox yuni natil laj avac'bun ti jcuxleje; uni liquel no'ox ti cuxulun ta aba ta asate. Ti xcuxlej scotolique, jech c'otem jech c'u cha'al junuc jic' o'ntonal.

⁶ Co'ol s'elan junuc queov xva'et no'ox ta x'ech' scotolic. Mu'yuc c'usi tun o ti laj stsob ti sc'ulejalique, mu na'baj buch'u ta stsob comel un.

⁷ Dios, ¿c'usi xa la ta jmala ti jech taj une? Le' une, jpatoj co'nton ta atojol.

⁸ Pojun yu'un ti jmul jcolo' jcuchoje; mu aq'uelojuc no'ox ta sna'leicun ti buch'utic pimunebique.

⁹ “Co'ol s'elan uma' laj jpas jba, mu'yuc c'usi loc' ta que ta jti', yu'un yacalot ta spasel ti c'usi lec ta xavile.

¹⁰ Ictao aba ta syalesel ti ac'ob ta jtojole. ta xa xilaj yu'un ti yipal xc'uxule.

¹¹ Ta xatojobtas ta tsitsel yu'un smul ti buch'uuc no'oxe; ta xajoybinbe ta pucuc ti bu batem xch'ulel xchi'uque. Jech c'otem yorail scotolic jech c'u cha'al junuc jic' o'ntonal.

¹² “A'yibun ti jc'opojel jti'inel une, Dios, ts'etanbun ani' achiquin ti xime'inal oq'ue, mu teyuc no'ox ts'ij xachi ti sts'ujlajan ti ya'lel jsate. Ta aba ta asate, jyanlumun, co'ol j'elan mut ti xvilet no'ox jelavele, naca j'ech'el-beun jech c'u cha'al laj ech'icuc ti jmolmuc'totac ta vo'nee.

¹³ Ch'an xa utun un, mu xavac' talel ti asat ta jtojole, xcuxuc to jliqueluc ti co'ntone, yo' to mu ta xvalc'uj ech'el ti lum ach'el ti ts'ij xichi batele.”