Salmos 37 - Bible in Tzotzil de Chamula

Pato avo'nton ta stojol ti Diose

¹ Mu soc ajol yu'un ti buch'u mu'yuc xch'ulel xa'i sbaique, mi ja'uc xlic yit'ixal avo'nton yu'un ti jchopol joletique.

² Ta jech yepal ta xtaquij jech c'u cha'al ti c'unil jobele; ta xlic nucultajuc jech c'u cha'al ti momole.

³ Pato avo'nton ta stojol ti Dios une, paso ti c'usi leque, cuxian ta banomil, j'ech'el tuc' xavac' aba.

⁴ Tec'luc ta avo'nton ti mu tenbaj ta xava'i ti Diose, ta xc'ot ta pasel yu'un ec un ti c'usi juteb ta avo'nton ta xata ava'ie.

⁵ Ac'bo sbain acuxlejal ti Diose; pato avo'nton ta stojol, ta xtal stic' sba ta scoltaelot.

⁶ Xojobin no'ox ta svinajes liquel ti avutsile, ti atuq'uile, jech c'u cha'al xtixet no'ox xojobal ti o'lol c'ac'ale.

⁷ Ts'ijano aba ta stojol ti Diose; muc'uc no'ox avo'nton ta smalael ti ta sva'an sba ta scoltaelote. Mu xlic sti'emal ajol yu'un ti buch'u caj tsacal xa'i sbae, ti buch'u yac'oj xa sjol ta spasel ti c'usi chopole.

⁸ Ictao ti soclij no'ox ajole, comtsano ti jbelot no'ox ta c'ope; yu'un ti il letoe, ja' soquesvanej ta j'ech'el.

⁹ Ti buch'u mu'yuc xch'ulel xa'i sbaique, jipatic xa loq'uel ta jteclum, ja'uc ti buch'u ta spat yo'ntonic ta stojol ti Diose, ta x'ac'bat yu'ninic ti oy sc'oplal ta xich'ique.

¹⁰ Mu xa sjaliluc sc'an ta xch'ay sc'oplal ti buch'u mu'yuc xch'ulel xa'i sbaique; mu junuc xavilbe sat ta j'ech'el, ac'o mi xachajilan ta sa'el.

¹¹ Ti buch'u biq'uit yac'oj sbaic une, ta xrextoinic ti banomile, ta sc'upinic ta j'ech'el ti yutsil slequile.

¹² Ti buch'u mu'yuc xch'ulel xa'i sbae, yacal ta sa'be smelol ta yilbel svocol ti buch'u stuc'ulanoj sbae, ta sti'emal xa sjol xnelet no'ox sat ta xq'uele yu'un.

¹³ Le' une, tse'ej no'ox ta x'a'yiat yu'un ti Diose, yu'un sna'oj lec ti ta xa xc'ot yorail ti buch'u mu'yuc xch'ulel xa'i sbae.

¹⁴ Ti buch'u mu'yuc xch'ulel xa'i sbaique, mu ta sc'obuc ta xa'i ta snit loq'uel ti yespadaique, xchi'uc ta xach'el ti syolobic ta yilbel svocolic ti me'un mu'nate, xchi'uc ti buch'utic spajebal mu'yuc c'usi x'ayan yu'une, ta smilel ti buch'u oy stuq'uilique.

¹⁵ Le' une, ta yespada no'ox stuc ta xpajbat ta yo'ntonic; ti syolobique, stuc xa sc'asalil ta xcom.

¹⁶ Jun yutsil ta j'ech'el ti c'u yepal oy yu'un ti buch'u lec yo'ntone, ja' mu sta yutsil ti busul no'ox sc'ulejal ti buch'u chopol ta xa'i sbaique.

¹⁷ Ti Diose, sta xa yorail, ta stubbe sts'unubal ti jchopol joletique, ja'uc ti buch'u oy slequil yutsilique, icbil japbilic.

¹⁸ Ti buch'u ta stuc'ulan sbaique, chabibilic yu'un ti Diose; mu'yuc stsutseb ta j'ech'el ma' ti xrextoique.

¹⁹ Ti yorail oy vocole, c'alal ja' o oy ti vi'nale, mu q'uexlal apunicuc, yu'un staojic ti c'usi ta stun ta slajesique.

²⁰ Co'ol s'elan taquin momol ta xc'aq'uic ti buch'u mu'yuc xch'ulel xa'i sbaique; ti yajcontratac Diose, ta sac ch'ayic batel jech c'u cha'al junuc ch'ail.

²¹ Mu sutes xch'omic ma' ti buch'u mu'yuc xch'ulel xa'i sbaique, ja'uc ti buch'u stuc'ulanoj sbae, mu xtenvan, oy xc'uxul yo'nton.

²² Ti buch'u c'uxbinbilic yu'un ti Diose, ta xrextoinic ti banomile, ja'uc ti buch'u bisbilic ta cotol chavale, ta xtubbat sc'oplalic.

²³ Ti Diose ta stojobtas ech'el ta sbe xaneb ti buch'uuc no'oxe; ta xac'be ech'el stam ti bu lec ta xile.

²⁴ Mi yal ta lume, mu staojuc yav nujul ta xcom o, yu'un ta xnite liquel yu'un ti Diose.

²⁵ Ti c'u s'elan lich'i lic'opoj ti molun xa tanae, mu'yuc laj quil ti jipbil tenbil ti buch'u oy yutsilique, mi ja'uc oy bu laj sc'anic limoxna ti yalab xnich'nabique.

²⁶ Scotol c'ac'al, oy no'ox xc'uxul yo'nton ta xa'i, sna' xt'olbij, staoj ep c'uxubinel ta sventa ti yalab xnich'nabe.

²⁷ Ch'aco aba ta stojol ti c'usi chopole, paso ti c'usi leque, ta xata ta j'ech'el bu ta xacux avo'nton.

²⁸ Ti Diose lec ta xil ti tuq'uil jol o'ntonale, mu sten sjip comel ti buch'u jun yo'ntonic ta stojole, ja'uc ti buch'utic mu'yuc xch'ulel xa'i sbaique, ta stubbe sc'oplal, mi junuc snitilultac ta scomtsanbe.

²⁹ Ti buch'u oy slequil ti c'usi ta spasique, ta xrextoinic ti banomile, sbatel osil ta xnaquiic tey.

³⁰ Ti buch'u oy slequile, naca bijilil ta xloc' ta ye ti c'usi ta xale; ti buch'u oy slequile ta xal ti c'usi oy slequil ta pasele.

³¹ Teq'uel ta yo'nton ti chanubtasel laj yac' ti Diose; j'ech'el mu xjaxbuj ti yacane.

³² Ti buch'u mu'yuc xch'ulel xa'i sbae, spa'ioj ti buch'u oy slequile, oy ta yo'nton ta smil ya'i.

³³ Ti Dios une mu sq'uelojuc ti ta x'och ta c'abale, mu sq'uelojuc ti jeche' no'ox ta xcajanbat ta sba ti oy smule.

³⁴ Pato avo'nton ta stojol ti Diose, ch'uno ti c'usi ta xale, cajal ac'oplal ta xc'ot yu'un, ta xac' arextoin ti muc' ta lume. Ta xavil ta aba ta asat ta xtub sc'oplal ti buch'u mu'yuc xch'ulel xa'i sbae.

³⁵ Quiloj ti toyobba xa'i sbae, ti buch'u mu'yuc xch'ulel xa'i sbae, co'ol s'elan jpets te' ti limil no'ox ech'el ti sc'obtaque.

³⁶ Le' une, bat to me yilel un, tub ti sc'oplale; laj jsa'ilan, mi ja'uc xa laj jta ta sa'el un.

³⁷ Q'uelo avil, xi sc'oplal ma' ti buch'u oy stuq'uil yutsil ti mu'yuc soquem ti sc'oplale: ta xlic c'otuc ta stojol ti lamajem yo'ntone.

³⁸ Ti buch'u toyobba xa'i sbaic une, ta j'ech'el ta xtubbat ti sts'unubalique; ti buch'u toj chopolique, q'uelel xa talel ta stojolic ti ta xc'otic ta tsutsele.

³⁹ Scoltaelic ti buch'u oy slequil yutsilique, ta xlic talel ta stojol ti Diose, c'otem ta spojobbailic c'alal yorail ta xc'ot ta pasel ti xi'bal sbae.

⁴⁰ Ta xpojatic yu'un ti Diose yo' jech ta xcolic. Ta xpojatic ti oyic ta c'abal yu'un ti buch'u mu'yuc xch'ulel xa'i sbaique, yu'un laj sa' spojelic ta stojol.