Salmos 36 - Bible in Tzotzil de Chamula

Ti mulil colo'ile xchi'uc yutsil yo'nton ti Diose

¹ Ti mulil nabal ta stojol ti buch'u mu'yuc xch'ulel xa'i sbae, ta xc'opoj talel ta yut yo'nton, mi ja'uc jutebuc xvul ta sjol ti sc'an xi'tael ti Diose.

² Tac'al o ta yo'nton ti lec albatuc ti sc'oplale, ti mu xtabat ta ilbel ti c'usi chopol ta spase.

³ Mu stac' alel ti c'usi ta xloc' ta yee, ti naca jutbil ta spase; tub ti snopbenal yu'une, laj yicta sba ta spasel ti c'usi leque.

⁴ Puch'ul xa ta stem, batem xa yo'nton ta snopel ti c'usi chopol ta pasele; chi' xa xa'i ta spasel ti bu chopol stamoj batele, mu ictabaj ta xa'i ti spajebal c'usi chopol ta spase.

⁵ Le' une, Dios, ti syail xc'uxul avo'nton une, c'otem c'alal to vinajel; c'otem ta yaxts'ijan vinajel un ti yutsil slequil avo'ntone.

⁶ Ti tuq'uil chapanel avu'une, co'ol s'elan jech c'u cha'al muc'tic vits; ti c'usitic nopbil avu'une, co'ol s'elan jun muc' ta nab ti mu albajuc snatil ti sninabile. Ti vo'ote, Dios, abainoj ta xchabiel ti jnaclejetique xchi'uc ti chon bolometique,

⁷ Ch'ul Dios, mu'yuc xa no'ox c'usi xco'olaj o ma' ti syail xc'uxul avo'ntone. Ta yolon aqueoval avaxinal, ta sa' spojelic ti buch'u ta sc'an coltaele.

⁸ Ta j'ech'el mu xa c'usi sna' ta xc'otic ta sventa ti busul no'ox ta j'ech'el ti c'usi stac' tunesel lajesel ta anae; jun no'ox yutsil ta xavac'be yuch'ic ti uc'ume.

⁹ Yu'un ti xcuxlejale, j'ech'el oy ta avoc ta ac'ob ta sbainel; ta axojobal ta xquilcutic ti saquilal osil une.

¹⁰ Mu xatub syail xc'uxul avo'nton xchi'uc ti alequilal ta stojol ti buch'u xayojtiquine, ti buch'u stuc'ulanoj sbaique.

¹¹ Mu aq'uelojuc no'ox ta xisju'icun ta teq'uel ti toyobbaetique, ti xischechicun xa ta jujujot ti buch'u mu'yuc xch'ulel xa'i sbaique.

¹² Labano avilic lec c'u s'elan ta xyalic ta lum ti jchopol joletique. J'ech'el ta xyalic ta lum, mu ja'uc xa ta stam sbaic liquel.