Salmos 33 - Bible in Tzotzil de Chamula

Sq'uejintael xchi'uc yalbel coliyal ti Diose

¹ Ti vo'oxuc ti oy slequilal yutsilal avo'ntonique, muyubajanic ta yalbel slequilal ti Diose; ti buch'u ta xalbe slequilal Dios ti oy slequil yutsil yo'ntonique, jelavem yutsil ta j'ech'el un.

² Albeic coliyal Dios c'alal xlomet no'ox ti arpae, q'uejintabeic q'uejimoletic c'alal ta xich' tijel ti jchop o ta vobetique.

³ Q'uejintabeic junuc ach' q'uejimol, xatij avobic ti stsac lec snuq'uilale.

⁴ Melel ma' ti sc'op Dios une, yu'un ta yabteltac ta svinajes ti yutsil yo'ntone.

⁵ Ti Diose lec ta xil ti c'usi oy stuq'uile, ti c'usi oy slequile; nojem ta sjunul banomil ti syail xc'uxul yo'ntone.

⁶ Ti vinajele, xchi'uc ti c'u yepal oy ta stojole, laj smeltsan ti Dios ta sventa ti sc'ope, ti ta yic'al no'ox ti yee.

⁷ Ta stsob ta jmoj ti vo'etique; ta xc'ot ta jun muc'ul nab yu'un.

⁸ Ich'ic ta muc' ti Diose, acotolic vo'oxuc li' oyoxuc ta banomile; ich'ic ta muc', acotolic jnaclejetic ta sjunul banomil.

⁹ Yu'un ta sc'opojel no'ox, lic meltsajuc scotol; ta smantal no'ox, lec com scotol.

¹⁰ Ti c'usi snopojic ta spasic ti jteclumetic ti yan yajvalique, ta xmacbatic ta be yu'un ti Diose.

¹¹ Ja'uc ti c'usi snopoj ta spas ti Diose, j'ech'el mu xch'ay ta be sbatel osil.

¹² Xmuyubaj no'ox ma' ti jteclum c'otem ta Ajvalil yu'unic ti Diose, ti c'otem ta yu'untac ti jteclum ti laj st'uj stuque.

¹³ Ti Diose, ta vinajel to, ta xq'uelvan talel, sq'ueloj scotol ti buch'uuc no'oxe.

¹⁴ Ti bu to nacale, yac'oj sat ta sq'uelel talel ti jnaclejetic ta banomile.

¹⁵ Yu'un ta yabtel stuc, lic smeltsanbe ti yo'ntontaque, xchi'uc sbainoj ta sq'uelel scotol ti c'usi ta spasique.

¹⁶ Mi junuc ajvalil ta xcol ta sventa yepal no'ox ti yajsoldadotaque; ja' no'ox jech ec ti tsatsaquil viniquetique mu xcol ta yipal no'ox yu'un stuquic.

¹⁷ Ti ca'etique mu'yuc yipic ta pojvanej ta stuquic no'ox manchuc mi tsots xu' yu'unic.

^18-19 Ti buch'u yich'ojic ta muc' ti Diose, ti spatoj yo'ntonic ta sventa ti syail xc'uxul yo'ntone, le'e, chabibilic yo' jech mu xcham xlajic; mu'yuc taqui ti'il ta xa'iic c'alal yorail ti vi'nale.

²⁰ Jpatoj co'ntontic ta stojol Dios ma' ti vo'otic une, yu'un jcoltavanej, jpojvanej cu'untic.

²¹ Xmuyubaj no'ox co'ntontic ta stojol ti Diose; j'ech'el jpatoj co'ntontic ta sventa ti yutsil slequilale.

²² Ti syail xc'uxul avo'nton une, Dios, oyuc o ta jtojolcutic jech c'u cha'al jmalaojcutique.