Salmos 31 - Bible in Tzotzil de Chamula

Patob o'ntonal ta j'ech'el ma' ti Dios une

¹ Ta jsa' ti jpojel ta atojol une, Dios, mu jeche'uc no'ox ti jpatoj co'nton ta atojole. Tic'o aba ta jpojel un, ta sventa ti yutsil slequil avo'ntone.

² Ta lequilaluc a'yibun ti jc'op une, ¡xan xch'a la' pojun un! C'otan ta jbejuc ton ti bu ta jmac jbae; c'otan ta jun natil luchlebal ti bu ta jnac' jbae, ti bu ta jpoj jbae.

³ C'otemot ta jpojobbail ta jnac'obbail jech c'u cha'al junuc toyol ch'en. Tojobtasun, tic'o aba ta jpojel un sventa ti ich'bil ta xac'ot ta muq'ue.

⁴ Chechun loq'uel ti li' ta pets' bu laj xa xchapanbeicune, yu'un jpojvanejot cu'un.

⁵ Ta jc'ubanbot ta avoc ta ac'ob ti jch'ulel canima une; pojun loq'uel un, Cajval Dios, ti atuc no'ox melel xac'opoje.

⁶ Ta xquilta ti buch'u nijil chimilic yich'ojic ta muc' ti uni loc'obbail no'oxe. Jpatoj co'nton ta stojol ma' ti Dios une.

⁷ Ta xiyac'bun smuyubajel siquetel co'nton ma' ti syail xc'uxul avo'nton une. Chajal ta aba ta asat ti laj jta ti at-o'ntone, xavojtiquin ti laj jta ti ilbajinele.

⁸ Mu'yuc laj avac'un ta yoc ta sc'ob ti jcontrae; lic'ot avu'un ti bu j'ech'el mu xiyal ta lume.

⁹ C'uxubajuc avo'nton un, Dios, yic'al xi'och ta c'abal. Ta xmac jsat, ta xlubtsaj sjunul jbec'tal jtacopal yu'un ti yipal xc'uxule.

¹⁰ Xquechet xa batel jabilal yu'un ti yipal xc'uxule, xchi'uc ti me'inal oq'uele. Ch'abal xa quip yu'un ti at-o'ntone, ta xa xcunbij ma' ti jbec'tal une.

¹¹ J'ac'-tse'ej lic'ot xa yu'un ti jcontratac une; j'ac'-labal lic'ot xa yu'un ti jlac'nataque. Xniquic xa ta xi'el cu'un ti buch'utic xiyojtiquin une; xjatavic xa batel cu'un ti naca ta xiyilic ta bee.

¹² J'ech'el laj xch'ayicun ta yo'ntonic, ti co'ol s'elan licham o xae. Co'ol j'elan lic'ot xa ta jbej jarru ti chichijem ta voq'uele.

¹³ Ca'binoj ti xi s'elan ta xalic ta coscos c'op ma' ti jnaclejetic une: “Buyuc no'ox oy ma' ti xi'el une.” Co'ol s'elan jun vinic oy c'usi ta spas ta jtojole; ta snopic ta xtuch'ic ti jcuxlejale.

¹⁴ Ti vu'une, Dios, jpatoj co'nton ta atojol; xichi laj cale: “¡Vo'ot, ma' ti Diosot cu'un une!”

¹⁵ Oy ta avoc ta ac'ob ti jcuxlejale; mu xavac'un ta yoc ta sc'ob ti cajcontrataque, ti sts'otetic no'ox ta jtojole.

¹⁶ Ta yutsil slequilaluc avo'nton, q'uelo ti avajtunel li'e, pojun ta sventa ti syail xc'uxul avo'nton une.

¹⁷ Ta xi'oc' xi'avan ta atojol un, Dios, mu xavac'un ta q'uexlal apun. Q'uexlal c'oticuc avu'un ti buch'u mu'yuc xch'ulel xa'i sbaique; jipo ochel ta ch'en ti bu sts'ijlajan ti muquinale.

¹⁸ Ts'ij xiuc sc'oplal ta j'ech'el ta bet'bunel yeic ta sjutel ti c'ope, ti naca jipel tenel labanvanej ti xbet'bun yeic ta yalele, ti ta soquesbe sc'oplal ti lequil tuq'uil vinique.

¹⁹ Mu albajuc slequil yutsil avo'nton ta stojol ti buch'u ta xayaq'uic ta ich'el ta muq'ue. Achabioj lec jech c'u cha'al jun c'ulejal ti toyol stojole, ti ta sba ta satic ti viniquetic une, ta xavac'be yich' ti buch'u spatoj yo'ntonic ta atojole.

²⁰ Ti pojobbailot nopol oyote, mu xavac' ta yoc ta sc'obic ti c'usi xa snopojic ti buch'u mu'yuc xch'ulel xa'i sbaique; ta yolonuc aqueoval avaxinal ta xapoj ti buch'u ixtol c'optabil yu'un ti scontrae.

²¹ Lequil c'optabiluc ta j'ech'el ti Dios une, ta sventa ti syail xc'uxul yo'ntone, muc'tic ti c'usi laj spas ta jtojol ti yorail oyun ta ilbajinele.

²² Ti mu xa stac' a'yeluc ta xca'ie, laj jnop ti laj ajipun loq'uel ta atojol une; le' une, c'alal laj jc'an ti coltaele, laj ava'i ti xi'avete.

²³ C'uxuc xava'iic ti Dios ti yu'unoxuc xae. Chabibilic yu'un Dios ti buch'utic jamal lec ti yo'ntonique, ja'uc ti jtoyobbaetique, ja' jech yepal ta xac'be stoj ti c'u s'elan laj xa spasique.

²⁴ Tsotsanic, tsatsajanic, oyuc yip avo'ntonic acotolic ti apatoj avo'ntonic ta stojol ti Dios une.