Salmos 3 - Bible in Tzotzil de Chamula

C'opojel ti'inel ta stojol Dios sventa ta xich' c'anel ti coltaele

¹ Cajval, ep ta j'ech'el ti jcontrae, ep ta j'ech'el ti svoloj sbaic ta scontrainelune.

² Ep ta j'ech'el ti xi ta xalic ta jtojole: “Mu xa ono'ox xpojat yu'un ma' ti Dios une.”

³ Ja'uc ti vo'ote, Dios, c'otemot ta jmacobbail, ta jpojobbail, ta cutsil jlequilal, ta xcha'ac'bel yip ti co'ntone.

⁴ Xi'avavet no'ox ta sc'anbel pojel ti Diose, ta xch'ul muc' ta vits to un, laj stac'bun talel ti jc'ope.

⁵ Ta jpuch'an jba, ta xivay xtoc un, ta xijulav, yu'un yicojun sjapojun ti Diose.

⁶ Mu xbat jch'ulel ta xi'el yu'un ti epal soldadoetic ti chapalic ta xistsaquicun ta c'ope.

⁷ Va'lan tec'lan, Cajval. Pojun un, Cajval Dios. Majbo sat ti jcontrataque, c'asbo stanal yeic ti jchopol jol o'ntonetique.

⁸ Vo'ot no'ox ti jpojvanejote, Cajval Dios, va'ano aba un cha'e ta stojol ti ateclumale.