Salmos 29 - Bible in Tzotzil de Chamula

Xi'el xac' sc'opojel ti Diose

¹ Xi xalequil-c'optaic Dios ti oyoxuc ta vinajele: lequil c'optabeic ti smuc'ul stsatsale, ti yutsilal slequilal ti Diose,

² lequil c'optabeic ti yutsilal slequilal ti Diose, nijano chimano abaic ta yich'el ta muc' ta slequil ch'ulna.

³ Xvinaj ta ba nab sc'opojel ti Diose; ti lequil utsilal Diose, yabtel ma' ti xi xc'avluj ti chauque: ti mu albajuc yepal ti nabe, sbainoj ma' ti Dios une.

⁴ Jelavem smuc'ul stsatsal sc'opojel ti Diose; tsots ta j'ech'el sc'opojel ma' ti Dios une;

⁵ sc'opojel ti Dios une, ta xjav yu'un ti ch'ut te'etique. Ti ch'ut te'etic ti oy ta vits Libanoe, ta xjav yu'un ti Dios une.

⁶ Ta xnic yu'un ti vits Libanoe, xchi'uc ti Sirione; xbitluj to ta xc'ot yu'un jech c'u cha'al tot vacax mi ch'in vacax.

⁷ Co'ol s'elan leb c'oc' xjaplajet no'ox sc'opojel ti Diose;

⁸ sc'opojel ti Diose, ta xnic ti sbajtical banomil yu'une; ti sbajtical banomil ti oy ta Cadese, ta sniques ti Dios une.

⁹ Sc'opojel ti Diose, ta xnic ti tulanetic yu'une, ch'abal ste'tical ta xcom ti banomile; ta xch'ulna une, scotolic ta snijan xchiman sbaic ta yich'el ta muc'.

¹⁰ Ti Diose sbainoj ta spasel ta mantal ti chaquilo'e; Ajvalil ti chotol ta spas mantal sbatel osil ma' ti Dios une.

¹¹ Ti Diose ta xac'be yip ti steclumale; ta sva'an sba ta yac'bel slequilal ti steclumale, mu'yuc c'usi xal yo'ntonic yu'un.