Salmos 22 - Bible in Tzotzil de Chamula

Oc' avanel yu'un ti vocole, xchi'uc ti q'uejimol xlamet yutsil ta a'yiele

¹ Dios Cajval, Dios Cajval, ¿c'u cha'al laj avictaun comel jtuc un? ¿C'u cha'al ti mu xtal apojun une? ¿C'u cha'al ti mu xats'etan ani' achiquin yu'un ti oq'uel avanele?

² Dios Cajval, c'ac'al ac'ubal xi'avet ta atojol, mi ja'uc ta xatac'bun un; mu jta bu xu' ta xcux ti co'ntone.

³ Ti le' une, Ch'ul Diosot ta j'ech'el, Jpas-mantalot, ti lequil c'optabilot yu'un ti Israele.

⁴ Ti jtot jme'cutic ta vo'nee laj spat yo'ntonic ta atojol; ti jech laj spat yo'ntonique, laj atic' aba ta spojel un.

⁵ Laj sc'anic coltael ta atojol, laj staic ti spojelic avu'une; ti jech laj spat yo'ntonic ta atojole, mu'yuc stselbuj avu'un un.

⁶ Xuvitun j'elan, ma'ucun jun vinic; j'ac'-labal tse'ejun yu'un ti jnaclejetique.

⁷ Ti buch'utic liyile xlabajic xa ta jtojol, xc'uxet xa yeic, sjim xa ti sjolique,

⁸ ti xi ta xalique: “Le'e, spatoj yo'nton ta stojol ti Diose, coltaatuc yu'un ti Dios un cha'e. Ti jech mu tenbaj ta xa'ie, ac'o scolta quic un.”

⁹ Xi ono'ox c'ot ta pasel une: livoc' talel avu'un ta stojol ti jme'e, laj jcux co'nton avu'un c'alal laj xchu'iltasune.

¹⁰ C'alal mu'yuc to voq'uemune, laj quich' chabiel avu'un; c'alal chi'inbilun yu'un ti jme'e, Diosot ono'ox cu'un.

¹¹ Mu xanamajes aba ta jtojol un, ta xa xc'ot ta jtojol ti ilbajinele, yu'un mu'yuc buch'u xiscolta.

¹² Co'ol s'elan tot vacaxetic joyolic ta jtojol ti jcontrae, co'ol s'elan pucujil tot vacax yu'un ti Basane;

¹³ co'ol s'elan jti'oval leonetic xloquet no'ox snuq'uic, ti xcach'et no'ox yeic ta xtal slubiicune.

¹⁴ Co'ol j'elan jech c'u cha'al junuc vo' ta xmal batel; mu'yuc xa stsacoj sba ti jbaquiltaque. Ti co'ntone ta sts'iji xa ech'el jech c'u cha'al junuc yulemal ti cerae.

¹⁵ Co'ol xa s'elan jech c'u cha'al jpech texa, staquinal ti quee; ti coq'ue alub xa, mu xa tots ta jpac'obe. Laj xa ajipun ochel ta muquinal bu xcununet ti lume.

¹⁶ Co'ol s'elan junuc ts'i' xa'i sbaic, mu'yuc xch'ulel xa'i sbaic, jti'ovaletic xvoletic no'ox talel ta jtojole; laj xa syayijesic ta voch'el ti jc'obe, ti cacane.

¹⁷ Jchol pic xa ma' ti jbaquiltac une. Spajojicun ta q'uelel ma' ti jcontratac une.

¹⁸ Ochemic ta xch'acbel sbaic ma' ti jc'u' une, ta yorail ta sq'uelic ti buch'u ta xc'ot ta yu'unique.

¹⁹ Le' une, Dios, jmuc'ul jtsatsalot, mu xanamaj batel, la' pojun ta anil un.

²⁰ Mu aq'uelojuc no'ox ta xicham ta milel ta espada, mu xavac' ave ta xismilic ti ts'i'etic le'e.

²¹ Pojun ta ye ti jti'oval leonetic le' une; tic'o aba ta jpojel yo' mu xve' cu'un xulub ti vacaxetic le'e.

²² Ta xcalbe ya'i ac'oplal ti jvinquileltaque, ta jlequil-c'optaot ti bu ta stsob sbaique.

²³ Ti vo'oxuque avich'ojic ta muc' ti Diose, ¡lequil c'optaic un! Acotolic snitiluloxuc ti Jacobe, alic yutsilal slequilal ti Dios une. Acotolic snitiluloxuc ti Israele, nijano chimano abaic ta yich'el ta muc'.

²⁴ Ti stuque mu sbaj, mu sq'uelojuc ti oy ta vocol ti buch'u biq'uit yac'oj sbae, mi ja'uc ta snac' sba ta stojolic. Ta xa'i ti c'alal ta xc'anbat ti coltaele.

²⁵ Ta sba ta sat yepal ti alumale, ta jlequil-c'opta ta yalel ti yutsil slequil avo'ntone; ta sba ta satic ti buch'u nijil chimilic ta atojole, ta xc'ot ta pasel cu'un ti c'usi caloj ta xcaq'ue.

²⁶ Nojeso abaic, ve'anic ti ilbajinbiloxuque. Lequil-c'optaic Dios ti vo'oxuc ta xasa'ique, ti jaluc jabil ch'ian c'opojanique.

²⁷ Xi s'elan sc'oplal ti muc'tiquil lumetique, xchi'uc scotol ti jnaclejetic ti jaylajun-tos sts'unubalic ti bu xa c'alal xpaj talel ti banomile: vuleso ta avo'ntonic ti Diose, la'ic ta stojol, quejano abaic ta sts'el ta yichon.

²⁸ Yu'un Ajvalil ma' ti Dios une, sventainoj ti muc'tiquil lumetique.

²⁹ Acotolic ti oy c'usi x'ayan avu'unique, nijano chimano abaic ta yich'el ta muc'. Acotolic ta xac'atajic ta lum ta ach'el, mu avac'ojbeuc abaic ti avuni cuxlejalique.

³⁰ Ti jnitilultaque ta snijan xchiman sbaic ta yich'el ta muc' ti Diose, ta xalbeic o sc'oplal ti c'u sjalil cuxulique.

³¹ Ti ts'acal jch'iel jc'opojeletique, ta xlic lo'iltabaticuc ya'iic c'u s'elan yutsil laj xchap ti c'ope, xchi'uc ti c'usi laj c'otanuc ta pasel yu'une.