Salmos 2 - Bible in Tzotzil de Chamula

Vo'ot ma' ti jnich'onote

¹ ¿C'u cha'al xvoletic xa ta spas sbaic ti jnaclejetic ti yan yajvalique? ¿C'u cha'al ya'yiel ochem yipal yu'unic ta snopel ti c'usi mu'yuc stuq'uile?

² Ti banquilal ajvaliletique xchi'uc ti its'inal ajvaliletic ti sbainojic ta sventainel ti jnaclejetique, jun xa sjolic lic scontrainic ti Diose, xchi'uc ti t'ujbil ajvalil yu'une.

³ Xi ta x'avanique: “Laj to sc'oplal ma' ti ta xischucotic ta carina taq'uin une. Jpoj jbatic ec un ti ts'otol xa caq'uiltic yu'une.”

⁴ Ti Dios ti sventainoj ti vinajele stse'in no'ox ta stojolic.

⁵ Ta jech yepal un, ta soquemal xa sjol, ta xlic sibtasan, ti ta yepal xa sc'ac'al yo'ntone, xi ta xalbee:

⁶ “Laj xa jt'uj ma' ti ajvalil buch'u ta sventain cu'un ti Sione, ja' ti ch'ul vitse.”

⁷ Ta jcaj'al ti xi s'elan snopoj ti Diose: ti xi laj yalbune: “Tana li'e, lanab cu'un ta ch'util, lac'ot ta jnich'on.

⁸ C'anbun ti c'otuc ta arexto ti muc'tiquil lumetique, ti bu xa c'alal ta xpaj talel jujuti' ti banomile, ta xc'ot ta avu'un, ta xcac'bot un.

⁹ Co'ol a'elan junuc taq'uin vaxton ta xatsutses ti ajvaliletique, ti stuc slilijemal busul ta xcom avu'un jech c'u cha'al ti lumal binetique.”

¹⁰ A'yibeic xchiquinal ava'iic li'e, banquilal ajvaliletic, its'inal ajvaliletic ti aventainojic ti banomile, tuc'ulanic ta spasel ti va'i s'elan ta xich' alel li'e:

¹¹ Cuxuluc lec ajol avo'ntonic, muyubajanic ta yich'el ta muc' ti Diose.

¹² Xi'tabiluc avu'unic ti nijil chimiloxuc ta stojole, yu'un mu ta vocoluc ta xlic sc'ac'al yo'nton ti ta xac'otic ta lajel yu'un mi ilin ta atojolique. Ja'uc ma' ti buch'u ta sa' spojelic ta stojole, xmuyubajic no'ox ta j'ech'el.