Salmos 19 - Bible in Tzotzil de Chamula

Xtixlajan yutsilal ti Dios ta sventa ti c'usitic laj smeltsanane

¹ Ti vinajel une ta svinajesbe yutsilal slequilal ti Diose; ta sventa ti yax'elan pujul xvinaj ta o'lole, ta xac' jna'tic ti ja' yabtele.

² Ti jujun c'ac'al ta x'ech'e, sbainoj ta yaq'uel ta na'el; ti ac'ubal ta x'ech'e, ta svinajesbe sc'oplal.

³ Manchuc mi mu xvinaj ta a'yiel ti sc'opojele, manchuc mi mu xvinaj ti buch'u ta xc'opoje,

⁴ ti sc'opojel taje, puquem ta scotol banomil, c'otem ti bu jujuti' oy ti banomile, xchi'uc c'alal to bu ac'bat yutsil ta x'ech' batel ti c'ac'ale.

⁵ Xmuyubaj xa ta xlic xanavuc ech'el ti c'ac'ale, co'ol jech c'u cha'al junuc banquilal j'anilajel, mi mo'oje, co'ol jech c'u cha'al junuc jlecomajel loc' batel ta na ti bu ta x'ech' ti lequele.

⁶ Ti c'ac'ale ta xloc' talel ta jot xocon vinajel; xjoyet ech'el ta xc'ot ta jot xocon un. Mi junuc ta snac' sba yu'un xq'uixnal ti xojobale.

⁷ Jun yutsil ta xchanubtasvan ma' ti Dios une, yu'un ach' cuxlejal xal o. Jun yutsil ta j'ech'el smantal ti Dios une, ta sbijubtasat yu'un ti buch'u nijil chimil yac'oj sbae.

⁸ Jun yutsil ta j'ech'el ti c'usi snopoj ti Diose, xmuyubaj ti o'ntonal yu'une. Naca lec smantaltac ma' ti Dios une, ta xjam ti bail satil yu'une.

⁹ Ti xi'tael ti Diose, jun yutsil ta j'ech'el, sbatel osil mu xch'ay sc'oplal. Melel ta j'ech'el ti c'usitic snopojan ti Dios une, oy stuq'uil yutsil ta j'ech'el scotol.

¹⁰ Cajal sc'oplal ta j'ech'el, ja' mu sta sc'oplal ti lequil oroe. X'ech' xjelav yutsil xchi'il, ja' mu sta yutsil xchi'il ti ajapome.

¹¹ C'otem ta scaj-tojobtasel yu'un ti avajtunele, lec ta xic'ot ta loq'uel yu'un mi ta jch'une.

¹² ¿Mi oy la buch'u ta xil stuc ti bu chopol ta xbat yu'une? Ch'ayo jpimil jtoyobbail, Cajval, mu xquil bu chopol ta xbat cu'un.

¹³ Jipbo loq'uel ta yo'nton stoyobbail ti avajtunele; mu aq'uelojuc ta xistsalun ti jtoyobbaile. Ti jech une, mu xitabat ti chopol jc'oplal une; mu lamaluc xc'ot ta jtojol mulil ti mu stac' albel ti sc'oplale.

¹⁴ Ch'ul Dios, ti jnac'obbailote, ti jpojvanejot une, lecuc xavil ta aba ta asat ti jc'opojel jti'inele, ti snopbenal cu'un une.