Salmos 18 - Bible in Tzotzil de Chamula

Q'uejimol ta sventa ti tsalele

¹ Ti vo'ote, Dios, jmuc'ul jtsatsalot ma' ti vo'ot une, mu xa jtuch'ot ta co'nton.

² Ti vo'ote, Dios, jpojobbailot, c'otemot ta jnac'obbailot, ta jcoltavanejot, jnac'obbail ton c'otemot, c'otemot ta jmacobbail ti co'ol s'elan oy ta toyol to ti nac'alun avu'une.

³ Ti vo'ote, Dios. ac'otebal ma' ti muyubtabilot une; c'alal ta xajtaot ta c'oponele, ta xapojun ta yoc ta sc'ob ti jcontrae.

⁴ Laj sts'otun ta xch'ojon ti lajel tubele; lixi' yu'un ti jmilvanej ti xvo'o'et no'ox talele.

⁵ Ti lajel tubele laj sts'otun ta xch'ojon; xi'bal sba ma' ti jpets'al laj jta yu'une.

⁶ Ti oyun xa ta vocole, laj jta ta c'oponel ti Diose, laj jc'anbe ti scoltaucun ma' ti Dios cu'une. Ta xch'ulna to, laj ya'i ti jc'opojel jti'inel; c'ot ta sni' ta xchiquin ti xi'avete.

⁷ C'ot ta pasel ti tsots xnicnun no'ox liquel ti banomil yu'une, ti xi c'ot ta pasele: nic ti vitsetic xchi'uc ti yicobtaque; nic ta sventa scapemal sjol ti Diose.

⁸ Sutubaj no'ox loc' talel yic'al sni', co'ol s'elan ti ch'aile; lajebal xa xal o xvajet no'ox c'oc' loc' talel ta ye, chac uban no'ox ti ac'al ta sjip talel ta yee.

⁹ Laj sjambe smac sti' ti vinajele, yal talel un. Ta yolon ti yoque, oy pimil lumal toc ta j'ech'el.

¹⁰ Laj scajlebin ti c'usi oy xiq'ue; xvilet batel ti cuchbil ta iq'ue.

¹¹ Laj sbis ta snac'obbail, ti bu ic'-pujan joyol ta stojole, co'ol s'elan c'ot ta yaxibal na, xchi'uc ti pimil lumal toc xcuchoj ti vo'e.

¹² Xjapluj no'ox liquel xojobal loc' talel ta stojol; xvajet no'ox tal bot ta toc, xchi'uc ac'al ti chac uban no'oxe.

¹³ Ti Dios ti oy ta toyole, xt'inluj to laj yac' ta a'yiel sc'opojel ti lic talel ta vinajele; tal ti bote xchi'uc ac'al ti chac uban no'ox ti sc'ac'ale.

¹⁴ Xjipte-jipte no'ox talel yu'un ti sni' syolobe; xc'avlajet no'ox vul ti chauque, mu'yuc xa smelol laj stenan sbaic batel ta xi'el ti jcontrae.

¹⁵ Ti sninabil nabe, sac jaman com yu'un ta j'ech'el; vinaj yictac ti banomil ta sventa xi'bal sba sc'opojel ti Diose, ti tsots laj xvuch'ta ta yic'ale.

¹⁶ Ta toyol to laj yac'bun talel sc'ob ti Diose; laj snitun loq'uel ta yoc ta sc'ob ta sjamalul ti nabe.

¹⁷ Laj spojun loq'uel ta yoc ta sc'obic ti jcontratac ti xti'et sjolic ta jtojole, ti jelavem xu' yu'unique, mu sta ti vu'une.

¹⁸ Ja' o yorail laj yilbeicun jvocol c'alal jtaoj ti jvocole, le' une, xi s'elan laj stic' sba ta jpojel ti Diose:

¹⁹ Lic'ot ta colel yu'un; laj stic' sba ta jpojel, mu tuch'baj ta yo'nton ta xiya'i.

²⁰ Ti Diose laj yac'bun jmoton, smatanalil ti stuq'uil jol co'ntone.

²¹ Jtamoj batel sbelel ti bu ta xbat ti Diose, yu'un mi ja'uc oy bu laj jsutes jba ta stojol ti Diose.

²² Mi ja'uc xch'ay xca'i ti c'u s'elan snopoje, mi ja'uc laj jbaj laj jten ti oy c'usi jbel tsots albil yu'une.

²³ Mi ja'uc oy bu laj jsoques jba ta j'ech'el ti bu ta xiyic' batele; jbevoj jba loq'uel ta stojol ti c'usi chopole.

²⁴ Ti Dios une laj yac'bun jmoton ti jech jun jol co'nton ta stojole.

²⁵ Ti vo'ot une, Dios, jun ajol avo'nton xchi'uc ti buch'u jun sjol yo'nton ta atojole; ti buch'u mu junuc yo'nton ta atojole, mu junuc avo'nton ta stojol ec.

²⁶ Jamal avo'nton ta stojol ti buch'u jamal yo'nton ta atojole, ja'uc ti buch'u sna' c'usi xut sbaic ti yalojique, tsots ta xava'an aba ta scontrainel.

²⁷ Ta xapoj ti buch'u biq'uit yac'oj sbaique; ta xavac' ta lo'il maxil ti buch'u toyobbaique.

²⁸ Cajval, ta sac jamtaj avu'un ti osil banomil ta jtojole; Dios cu'un, ti ic'uneb ti osil banomil ta xca'ie, xojobin liquel avu'un un.

²⁹ Ti jech ta xacoltavane, ta xquilbe svocol ti jcontrataque; ta xibit ochel ta sba smocal ti slumalique.

³⁰ Ti bu stamoj batel ti Diose, jun yutsil ta j'ech'el; jpat co'ntontic yu'un c'usi yaloj ti Diose. Ti Diose ta stic' sba ta spojel ti c'u yepal spatoj yo'ntonic ta stojole.

³¹ ¿Buch'u xa ono'ox la Ajvalil mi ma'uc ti Diose? ¿Mi oy to yan dios xu' ta stic' sba ta jpojeltic?

³² Ja' ta xiyac'bun quip ti Diose, ti ta xc'ot ta pasel yu'un mu xyanij ti jc'oplale.

³³ Ta xac'bun canilajeb yo' jech xibitet ta anil jech c'u cha'al junuc te'tical chij; ta xc'ot ta pasel ti mu spilts'uj coc ti bu toyolique.

³⁴ Ta xistojobtas ta yaq'uel ti letoe, ta yaq'uel quip ta xach'el ti c'anal taq'uin yolobe.

³⁵ Ta xatic' aba ta xchabielun ta spojelun, avicojun ta abats'i c'ob; ta sventa yutsil avo'nton une, cajal c'ot ti jc'oplale.

³⁶ Jambil lec avu'un ti jbe jxanebe, mi ja'uc oy bu ta spilts'uj ti cacane.

³⁷ Laj jta ta tsaquel ti cajcontratac ti jnutsojan batele; jtuc xa no'ox lisut talel c'alal laj jtsutsesan comele.

³⁸ Laj jlilinic comel ta j'ech'el. Mu'yuc xa laj stam sbaic liquel un. Lamal c'otic ta coc.

³⁹ Laj avac'bun quip ta ac'-leto; c'ot ta pasel avu'un ti nijil c'otic ta jtojol ti jtoyobbaetique.

⁴⁰ Jatvil xa loq'uic ech'el ta jtojol ti cajcontra une; c'ot ta pasel ti laj jtsutses ta slilinel ti buch'utic xti'et sjolic ta jtojole.

⁴¹ Sc'anic xa pojel, mu'yuc buch'u tal coltaaticuc; xavtaic xa ti Diose, mu'yuc xtac'batic talel.

⁴² Ta jech yepal sac ch'ayic cu'un jech c'u cha'al pucuc ti cuchbil ta xbat ta iq'ue. Laj jpech'ilan ta teq'uel jech c'u cha'al junuc ach'el ta be.

⁴³ Laj apojun ta yoc sc'ob jun toyobba jteclum; li'och ta jun banquilal avu'un ta stojol ti muc'tiquil jteclume; ti jun jteclum ti mu xcojtiquinane, c'ot ta cajtunel avu'un.

⁴⁴ C'alal ta xa'iic ti jc'opojele, ta xch'unbeicun; jun yutsil ye sti'ic ta jtojol ma' ti jyanlumetic taje.

⁴⁵ Jyanlumetic ti stsic'tsun xa yo'ntonique, xnicnunic xa ta xloq'uic talel ti bu nac'alique.

⁴⁶ Jun yutsil ma' ti Dios une, lequil c'optabiluc ti jpojvanej cu'une. Toybiluc c'otuc sc'oplal ma' ti Dios jcoltavanej une.

⁴⁷ Ja' laj spacbun jc'oplal ma' ti Dios taj une, ti mu'yuc xa c'usi xut sba c'otic ta jtojol ti jteclumetic yu'une.

⁴⁸ C'otem ta jcoltavanej cu'un c'alal soquem sjolic ti jcontrataque, xchi'uc ti jtoyobbaetic laj syales yoc sc'obic ta jtojole. Ti vo'ot une, Dios, ta xapojun ta yoc ta sc'ob viniquetic ti buch'u xi'bilique.

⁴⁹ Jech o xal un, Dios, ta sba ta satic ti muc'tiquil lume, ta jlequil-c'optaot, ta jq'uejinta q'uejimoletic ta aventa.

⁵⁰ La'abolaj ti jtsalvanej c'ot avu'un ti ajvalil laj at'uje; ayalesoj syail xc'uxul avo'nton ta stojol ti Davide xchi'uc ti snitilultaque.