Salmos 149 - Bible in Tzotzil de Chamula

Ti Diose, Ajvalil ta sventa lic ayanuc talel ti c'usitic oye

¹ Jun yutsil ta j'ech'el ma' ti Diose. Q'uejintabeic junuc ach' q'uejimol ti Diose. Ti bu vololic ti buch'u oy stuq'uil sjol yo'ntonique, ba lequil c'optaic Dios bu taje.

² Muyubajanic ta j'ech'el, israeletic, ti ateclumalic ti Sione, yu'un ti Diose, c'otem ta Ajvalil avu'unic, laj yac' ach'ulelic.

³ Ta sventauc, bitanic ta ac'ot ta slequil c'optael, ti jmojuc xa lometuc ti arpae, xchi'uc ti chij chij taq'uin ta sq'uejintael ti q'uejimoletique.

⁴ Ti Dios une xmuyubaj no'ox xchi'uc ti steclumale; Jtsalvanejetic c'otic ti buch'u biq'uit yac'oj sbae, cajal ta xc'ot sc'oplal.

⁵ Muyubajanic yu'un ti vo'oxuc tuc' ajol avo'ntonic ti tsalvanem lac'otique, manchuc mi ta xacux avo'ntonic, q'uejinanic ta muyubajel.

⁶ Oyuc ta ave ati'ic slequil c'optael ti Diose. Oyuc ta avoc ac'ob ti espada cha'jot yee,

⁷ ta spacbel sutel ya'iic ti buch'utic yan yajvalique, ta yilbel svocol ya'iic ti muc'tiquil lumetique,

⁸ ta xchuquel ta carina ya'iic ti ajvaliletique, ta xchuquel ta alal carina taq'uin ya'iic ti yajval lumetic ti cajal xa'i sbaique,

⁹ yo' ta xc'ot ta pasel c'u s'elan ts'ibabil ti sc'oplale. Taje, yich'elic ta muc' scotolic ti buch'u tuc' sjol yo'ntonique. Jun yutsil ta j'ech'el ma' ti Dios une.