Salmos 146 - Bible in Tzotzil de Chamula

Slequil c'optael ti c'usitic pasbil yu'un ti Diose

¹ Jun yutsil ta j'ech'el ti Diose. Sjunul jch'ulel canima, ta jlequil-c'opta ti Diose.

² Ti li' to xvic'vun ti jsate, ta jlequil-c'opta ti Diose; ti li' to cuxulune, ta jq'uejinta q'uejimoletic ta stojol ti Diose.

³ Mu xapat avo'ntonic ta stojol viniquetic ti cajal yabtel yich'ojique, viniquetic no'ox ti mu xu' yu'un ta xpojvane,

⁴ yu'un c'alal mi chamique, ta xjoybij ta lum ach'el. Ta sc'ac'alil taj une, ts'ij xi sc'oplal yu'un ti c'usi snopoj ta spase.

⁵ Mu'yuc c'usi sna' ti buch'u ta sta coltael ta sventa Dios yu'un ti Jacobe, yu'un spatoj yo'nton ta stojol Dios ti Ajvalil yu'une.

⁶ Ti stuque laj smeltsan ti vinajele, ti banomile, ti muc' ta nabe, xchi'uc scotol ti c'usitic cuxulic ta stojole. Mi jutebuc stselbuj ti sc'ope.

⁷ Ta stic' sba ta spojel ti buch'u ilbajinbilique. Ta xac'be sve'el ti buch'u ta xa'iic vi'nale. Ti Diose ta sloq'ues ta chuquel ti buch'u chuculique.

⁸ Ti buch'utic ma'satetique, ta xlic vic'batuc yu'un ti Diose. Ti buch'u lomemic ta lume, ta xtoyeic liquel yu'un ti Diose. Mu tenbiluc jipbiluc yu'un Dios ti buch'u oy yutsil yo'ntonique.

⁹ Ti jyanlumetique, ti me'un mu'nate, ti me'unal antsetique, icbil japbilic yu'un ti Diose, yan ti buch'u mu'yuc xch'ulel xa'i sbaique, ta xch'ay ta be yu'un.

¹⁰ Sbatel osil, ja' Ajvalil ma' ti Dios une; ti Dios avu'une, Sión, sbatel osil ta sventainot. Jun yutsil ta j'ech'el ti Diose.