Salmos 144 - Bible in Tzotzil de Chamula

Colaval, xut Dios ti ajvalile

¹ Jun yutsil slequil ti Diose, ti jpojvanej jnac'vanej cu'une, ti Buch'u ta xistojobtasun ta xischanubtasun ta sventa ti ac'-letoe,

² ti Buch'u lec xquil jba xchi'uque, ti c'otem ta toyol jnac'obbaile, ti jpojvanej jcoltavanej cu'une, ti c'otem ta jmacobbaile, ti jmacoj jba ta stojol une, ti ta xiyac'bun ta coc ta jc'ob ti jteclumetic une.

³ Cajval, ¿buch'u ya'yel ti vinic xvulvun avo'nton yu'une? ¿Buch'uic ya'yel ti lum ach'el ti ech'em c'ux ta xava'ie?

⁴ Co'ol s'elan jic' o'ntonal ta x'ech' ti vinique, xtemet no'ox jelavel xcuxlej jech c'u cha'al ti queove.

⁵ Cajval, jamo talel smac ti vinajeletique, yalan talel un, ac'o avoc ac'ob ti tometuc no'ox liquel xch'ailal ti vitsetique.

⁶ Xjipte-jipteuc no'ox batel sni'tac ti ayolobe, ti japlajetuc no'ox avu'un ti sac tsele, ti tan pucuc baticuc ta jatobal ti avajcontrataque.

⁷ Ye'o talel ti ac'ob ta toyole, pojun ti sc'an ta smut'iun ya'i ti muc' ta nabe, pojun ta yoc ta sc'obic ti jyanlumetique,

⁸ ti buch'utic naca jutbil ti c'usi ta xalique, ti snub xa yoc sc'obic ta yalel ti jeche' no'oxe.

⁹ Cajval, ta jq'uejintabot ach' q'uejimol, ti xlomet xa jchop o ta vob ta jq'uejintabot q'uejimoletique.

¹⁰ Ti ta xc'otic ta jtsalvanej avu'un ti ajvaliletique, ti ava'anoj aba ta spojel ti avajtunel Davide, pojun yo' jech mu xve' ti espada cu'une.

¹¹ Pojun ta yoc ta sc'ob ti jyanlumetique, ti buch'utic jutbil ti c'usi ta xalique, ti snub xa yoc sc'obic ta jeche' no'ox ti c'usi ta xalique.

¹² Jechuc ch'iuc ti jnich'oncutic jech c'u cha'al te' ta yavil nichime. Jechuc ta q'uelel ti jtsebcutic jech c'u cha'al ti muc' ta oyetic yicobinoj ti ch'ulnae.

¹³ Nojuc no'ox ta j'ech'el ta sq'uejobiltac ti ep ta tos c'usitic stac' tunel lajesele. Boluc ta j'ech'el ma' ti jchijcutique. Yepaluc c'uletuc ta jujusep ti cosilcutique,

¹⁴ ti naca xnab no'ox yol ti sme' jvacaxcutique, ti mu'yucuc ta syales ti yole. Ti ta beetic cu'uncutique, lajuc sc'oplal ta a'yiel ta avlajetel ta scoj ti oy no'ox c'usi ta xtal ta xa'iique.

¹⁵ Mu'yuc c'usi sna'ic ti jteclum ti oy yu'unic scotol taje. Mu'yuc c'usi sna'ic ti jteclum ti c'otem ta Ajvalil yu'unic ti Diose.