Salmos 142 - Bible in Tzotzil de Chamula

C'otemot ta jpojobbail

¹ Tsots xi'avet ta stojol ma' ti Dios une; tsots xi'avet ti xc'uxubinucune.

² Ti slo'il yatel co'ntone, ta xcac'be ta stojol; ta xcac'be sna' ti ilbajinel ta xquich'e,

³ ti mu xa jtam jba yu'un ti jvocole. Xavojtiquin, Cajval, xi s'elan ti be jtamoj batele: ta jbe ti bu ta xi'ech'e, yac'ojic pets'.

⁴ Jq'uel xa batel ta stuq'uil jbats'i c'ob, mi junuc oy buch'u ta stic' sba ta scoltaelun. Mu'yuc junuc ta sva'an sba ta spojelun. Mu'yuc junuc ti svul xa yo'nton cu'une.

⁵ Xi'avet ta atojol, Cajval, ti xi ta xcalbote, Dios: “C'otemot ta jnac'obbail; atuc no'ox jech ti spajeb oyot ta jtojole.”

⁶ Ts'etanbun ani' achiquin ti xi'avalete, lubtsajemun xa ta xca'i. Pojun ta yoc ta sc'obic ti buch'u ta xilbun ya'i ti jvocole, yu'un x'ech' to xjelav xu' yu'unic, mu sta ti vu'une.

⁷ Loq'uesun ti bajalun ta chuquele yo' ta jlequil-c'optaot. C'alal lec ta xc'ot ta jtojol avu'une, ti buch'utic oy slequil yutsil yo'ntonique, ta svol sbaic talel ta jtojol.