Salmos 140 - Bible in Tzotzil de Chamula

C'opojel ti'inel ta sc'anel pojel yu'un ti Diose

¹ Cajval, mu xavac'un ta yoc ta sc'ob ti buch'utic mu'yuc xch'ulel xa'i sbaique; pojun ta yoc ta sc'ob ti capem sjolic ta j'ech'ele,

² ti buch'utic batem ta yo'ntonic ta spasel ti c'usi chopole, ti scotol c'ac'al yabtelinojic sliquesel ti letoe.

³ Ts'ubajtic no'ox sts'uts'opic jech c'u cha'al chij chon ti c'usi ta xloc' ta alel yu'unique, co'ol s'elan svenenoal ye jti'oval chon.

⁴ Cajval, pojun ta yoc ta sc'obic ti buch'utic mu'yuc xch'ulel xa'i sbaique, pojun ta yoc ta sc'obic ti capem ti sjolic ta j'ech'ele, ti xchapanojic xa lec ti c'u s'elan ta xisjipicun ta lume.

⁵ Ti buch'utic toyobba xa'i sbaique laj xchapanbeicun jpets'al, laj xa xlich'anic jyacobil xchi'uc jchucobil, naca xa pets'etic yac'ojic ti bu jtamoj batele.

⁶ Xichi ono'ox caloj ta stojol ti Diose: “Diosot cu'un, ¡a'yibun ti xi'avalet ta vocoletele!

⁷ Jch'ul-tot, Cajval, jcoltavanejot ti jelavem xu' avu'une, ta xapojun yo' mu jta majbel jol c'alal xyaquet ti letoe.”

⁸ Mu xavac' ave ati', Cajval, ti ta xc'ot ta pasel yu'unic ti c'usi ta sc'anic ti buch'u mu'yuc xch'ulel xa'i sbaique, ti yantic xich' batel yip yu'unic ti c'usi nopbil yu'unique.

⁹ Ti j'ac'-bac-vocoletique, ti cajal xa xa'i sbaic joyolic ta jtojole, stojuc ya'iic ta sjol stuquic ti c'usi ta xloc' ta nopel yu'unique.

¹⁰ Cajal c'otuc ta sbaic ti chacloman ac'ale; jipaticuc yalel ta joq'uetic ti bu j'ech'el mu xa xloq'uic talele.

¹¹ J'ech'eluc ch'ayuc sc'oplal ta banomil ti buch'u mu'yuc spajeb ti ye sti'ique; q'ueleluc ya'iic ta stojolic ti j'ech'el tsutsuc ti sc'oplalique.

¹² Jna' lec, ti Diose ta stic' sba ta spojel ti buch'u mu'yuc c'usi x'ayan yu'une, ta sva'an sba ta spojel ti buch'u mu ta smulicuc ta sta ti svocole.

¹³ Ta xlequil-c'opojic ta atojol ti buch'utic sna' sbic'tajes sbaique; ti buch'utic ta spas ti c'usitic leque, jun yo'ntonic ta atojol.