Salmos 139 - Bible in Tzotzil de Chamula

Ti Diose sna' lec scotol

¹ Cajval, chajal lec ta aba ta asat ti c'u j'elane, xavojtiquinun lec.

² Xavojtiquin lec scotol ti c'usi yac'oj jol ta spasele; ac'o mi nom to oyot, chapal lec avu'un ti c'usi ta jnope.

³ Xana' lec scotol ti c'u j'elan ta xixanav ta xibeine; xana' lec scotol ti c'usi ta jpase.

⁴ Ac'o mi mu to ta xloc' ta que ti c'usi ta xcale, ti vo'ote, Dios, xana' xa ono'ox.

⁵ Laj avac' talel ti ac'ob ta jtojole; macbil lec lic'ot yu'un ta jujujot.

⁶ Ti abijil une, ch'ayal ta xc'ot o'ntonal yu'un; spajeb xa no'ox ti mu xchiquintaj cu'une.

⁷ ¿Mi yu'un stac' la ta jch'ac jba ech'el ta nom ta stojol ti acuxlejale? ¿Mi yu'un stac' la ta xijatav loq'uel nom ta atojol?

⁸ Mi ta ximuy batel ta toyol vinajele, tey oyot ec; mi ta xiyal batel bu c'alal spajeb snatil ti banomile, tey oyot xtoc.

⁹ Mi xivilil to batel ta anil ti xi ta sloq'ueb c'ac'ale, mi xba naclucun ti bu c'alal xpaj talel ti nab ta smaleb c'ac'ale,

¹⁰ ti bu taje, c'otem ti avoc ac'obe; uninbilun ta j'ech'el yu'un ma' ti stsatsal avoc ac'obe.

¹¹ Mi ta jnop xba jnac' jba ta ic'al osile, mi ta xjoybij ta ac'ubaltic ti saquilal osile,

¹² ti ic'al osile, mi juteb xu' ta xisnac' ta aba ta asat, sac jaman no'ox jech c'u cha'al c'ac'altic ti ac'ubale. Ti ic'al osile xchi'uc ti sac jaman no'ox ti osile, co'ol no'ox sba ta xavil.

¹³ Yu'un vo'ot avabtel ti jbec'tal jtacopale, ti laj ac'atajesun ta xch'ut ti jme'e.

¹⁴ Ta jlequil-c'optaot un, yu'un ch'ayal ta xc'ot co'nton avu'un ti yan yutsil ta q'uelel ti c'usi laj apase. Ta sventa taje, tac'bil c'ot ta muc' cu'un.

¹⁵ Chajal lec ta aba ta asat c'u s'elan lic quich' talel ti jbec'tale, ac'o mi mu ta yelovaluc osil ti bu linabie, spajeb xa yut ti banomil ti bu lic'ataje.

¹⁶ Laj avil ta aba ta asat c'u s'elan lic chapajuc talel ti jbec'tale; scotol taje ts'ibabil com ta jpoc avun un. Chapal xa ono'ox avu'un c'u sjalil jch'iel jc'opojel c'alal mu'yuc to ox c'usitic oye.

¹⁷ Ch'ul Dios, mu cha'bel jtabe spajeb ti bu c'alal anopoje; mu na'bajuc ti c'usitic ta xanope.

¹⁸ Mi ta xlic ochcun ta xchapale, ja' nan juteb ta xcom c'u yepal oy ti yi'e, oyun xa ox ta atojol jna' mi c'ot ta tsutsele.

¹⁹ Ch'ul Dios, ch'aybo sts'unubalic ti buch'u mu'yuc xch'ulel xa'i sbaique, q'uejo loq'uel ta jtojol ti jmilvanejetique,

²⁰ ti buch'utic ta xchopol c'opojic ta atojole, ti xvoletic no'ox liquel ta scontrainelote.

²¹ Cajval, ¿mi mu la xti'etuc jol ta stojol ti buch'utic xti'et sjolic ta atojole, ti cajal xa'i sba xchi'uc ti ye sti'ique?

²² Sjunul co'nton mu lecuc ta xquil ta j'ech'el, ja' jcontratac ta xquil.

²³ Ch'ul Dios, tuc'ulanun lec ti c'u j'elane, ojtiquino avil ti co'ntone; q'uelbun avil ti co'ntone, ojtiquinbun avil ti snopobiltac cu'une.

²⁴ Q'uelo avil mi jtamoj batel ta spasel ti chopole, tojobtasun batel ta be ti bu sventa sbatel osile.