Salmos 135 - Bible in Tzotzil de Chamula

Muc'tic no'ox c'usi laj c'otuc ta pasel yu'un ti Diose

¹ J'ech'el lequil c'optabiluc ti Dios une. Lequil c'optabiluc avu'unic ti Diose, lequil c'optabiluc avu'unic ti yajtuneloxuque,

² ti oyoxuc ta xch'ulna ti Diose, ti oyoxuc ta yamaq'uil xch'ulna ti Dios cu'untique.

³ Lequil c'optaic ti Diose, yu'un oy slequilal; q'uejintaic q'uejimoletic ta sventa, yu'un sna' xc'uxubaj.

⁴ Laj st'uj ti Jacob ti ja' Israele, ti tsots stunel c'ot yu'un ta stojole.

⁵ Jna' lec, ti Cajvaltique, ja' Dios cu'untic, jelavem smuc'ul stsatsal, mu sta ti yan diosetique.

⁶ Yu'un ti Diose ta spas scotol ti c'usi ta sc'ane, jech c'u cha'al ta vinajel xchi'uc ta banomile, jech c'u cha'al ta nab xchi'uc ta sninabile.

⁷ Xva'et no'ox muyel yu'un toc ta yibel ti vinajele; xc'avlajet no'ox yu'un ti chauque, ti ta xac' ta na'el ti ta xtal ti chaquilo'e, ti xvo'o'et no'ox loq'uel ti ic' bu q'uejajtic yu'une.

⁸ Laj syales yoc sc'ob ta smilel scotol ti banquilal nich'nabiletic yu'un ti jujuchop jnaclej egipcioetique, xchi'uc sba yoltac ti chon bolometic yu'unique.

⁹ Ta o'lol yu'un ti jteclum Egiptoe, ja' stuc laj stac talel ti ch'ayal o'ntonal ta xc'ot yu'une, ti c'usitic ta xac' ta ilel ta scontrainel ti faraone xchi'uc ti yaj'opisialtaque.

¹⁰ Laj syales yoc sc'ob ta smilel ep muc'tiquil lumetic; laj stubbe sc'oplal ajvaliletic ti tsots xu' yu'unique,

¹¹ jech c'u cha'al ti ajvalil yu'un ti amorreoetique, jech c'u cha'al ti Og ajvalil yu'un ti jteclum Basane, jech c'u cha'al scotol ti ajvaliletic ti oyic ta Canaane.

¹² Ti yosil sbanomilic ti ajvaliletic taje, laj yac'be ta xrextoin ti Israel ti ja' steclumale.

¹³ Cajval, sbatel osil mu xtub ta alel ti ac'oplale, ti vulesbilot ta o'ntonal sbatel osile.

¹⁴ Ti Diose ta stic' sba ta spojel ti steclumale, oy xc'uxul yo'nton yu'un ti yajtuneltaque.

¹⁵ Ti sdiosic ti buch'utic yan yo'ntonique, meltsanbil ta oro, ta plata, ta yabtel yoc sc'obic viniquetic no'ox.

¹⁶ Loc'tabil yeic, mu xu' xc'opojic. Loc'tabil sbec' satic, mu x'ilvanic.

¹⁷ Loc'tabil xchiquinic, mu xa'iic c'oponel. Mu jutebuc yich'oj xch'ulelic.

¹⁸ Co'ol s'elan c'otemic ec ti buch'utic yabtelinojic ti loc'obbaile, xchi'uc ti buch'utic nijil chimilic ta yich'el ta muq'ue.

¹⁹ Israeletic, lequil c'optaic ti Diose. Paleetic, lequil c'optaic ti Diose.

²⁰ Levitaetic, lequil c'optaic ti Diose. Vo'oxuc ta xaxi'taic ti Diose, lequil c'optaic ec.

²¹ Lequil c'optabiluc ti oy ta Sione, yu'un ti Diose nacal ta Jerusalén. J'ech'eluc lequil c'optabiluc ti Dios une.