Salmos 126 - Bible in Tzotzil de Chamula

Jeluc avu'un ti c'usi q'uelel ta jtojolcutique

¹ Vaichtic ya'yel c'alal laj sjel Dios ti c'usi q'uelel ta stojol ti jteclum Sione.

² Va'i un, ti que jti'tique mu'yuc spajeb ximuyubaj xij'avlajet no'ox ta tse'ej. Ti buch'utic yan yajvalique xi lic yalique: “¡Ma' ti muc'tic no'ox cac'tic ti c'usi laj spas ti Dios ta stojolique!”

³ Yu'un ti jech muc'tic ti c'usi laj spas ti Dios ta jtojoltique, xijmuyubajotic no'ox yu'un.

⁴ C'otuc ta pasel avu'un, Cajval, jeluc ti c'usitic q'uelel ta jtojolcutique, jech c'u cha'al ta xjel ti sbajtical banomil c'alal ta xac' ti vo'e.

⁵ Yu'un ti buch'utic ta ya'lel sat ta sts'un ti sts'unubale, c'alal naca xa ta stsobique, x'avanic no'ox ta muyubajel ta j'ech'el.

⁶ Ac'o mi oy bu ta x'oq'uic ti c'alal naca to xcuchojic batel ti sat sts'unubique, le' une, ta sta yorail ti xmuyubajic ta xq'uejinic c'alal xq'uechojic xa talel ti chucbiquil trigoe.