Salmos 12 - Bible in Tzotzil de Chamula

C'oponel ti'inel ta sc'anbel coltael ti Diose

¹ Coltauncutic un, Dios, mu'yuc xa junuc ta sbisot ta yajvale; mu xa junuc viniquetic ti jamal lec yo'ntonique.

² Jujun ta sjutanbe sbaic ti c'ope; jun xa yutsil ma' ti ye sti'ic ta spas sbaic une, naca ta joyob c'op ti c'usi ta xalique.

³ Dios, ch'ab xiuc sc'oplal avu'un ta j'ech'el ti buch'utic jun xa yutsil ti ye sti'ic ta spac'ta sbaique, xchi'uc ti jliquesej c'opetique,

⁴ xchi'uc ti buch'u xi ta xalique: “Oy que jti'tic un quere, xpac xa cuni c'oplaltic yu'un ti quetique. ¿Buch'u la xu' yu'un ta xispasotic ta mantal un?”

⁵ Xi s'elan laj yal ma' ti Dios une: “Ti me'un mu'natetique, xchi'uc ti buch'utic mu'yuc xa yipique, ilbajinbilic, ac'bil svocolic. Jech o xal avi tana li' une, ta xlic jva'an jba ta scoltaelic ti juteb ta yo'ntonic c'otuc ta pasel une.”

⁶ Ti oy c'usi yaloj ti Dios ta xaq'ue, naca lec ta j'ech'el, co'ol s'elan jech c'u cha'al junuc plata ti vuc-coj (7) loq'uesbil yic'obal ta c'oq'ue.

⁷ Ti vo'ote, Dios, ta xachabiuncutic; j'ech'el pojuncutic ta yoc ta sc'ob ti jech viniquetic taje.

⁸ Ti buch'u mu'yuc xch'ulel xa'i sbaique, xvoletic no'ox ta jujujot; scotol banomil un, xch'i xa xa'iic ta yalel ti c'usi chopol ta xc'ot ta pasele.