Salmos 115 - Bible in Tzotzil de Chamula

Oy ta vinajel ma' ti Dios cu'untique

¹ Cajval, ta aventauc atuc, ich'biluc c'otan ta muc', ma'uc ti vu'uncutique; ta sventauc ti syail xc'uxul avo'ntone xchi'uc ti melele, ich'biluc c'otan ta muc'.

² ¿Mi mu tauc sjaq'uic ti buch'u yan yajvalique, bu oy ti Dios yu'unic le'e?

³ Oy ta vinajel ma' ti Dios cu'untique; laj xa smeltsan scotol ti bu xa c'alal xal ti yo'ntone.

⁴ Ti loc'obbailetic yu'unic ti buch'u yan yajvalique, meltsanbil ta oro, ta plata, ti smeltsanoj ta yabtel yoc sc'ob vinic ti xi s'elane:

⁵ Loc'tabil ti yeique, mu xc'opojic. Loc'tabil ti sbec' satique, mu x'ilvanic.

⁶ Loc'tabil ti xchiquinique, mu xa'iic c'oponel. Loc'tabil ti sni'ique, mu xich'ic ic'.

⁷ Loc'tabil sc'obic, mu stac' xach'. Loc'tabil yacanic, mu xanav xchi'uc. Mu jbeluc c'op xloc' ta yeic.

⁸ Co'ol s'elan c'otemic ec ti buch'u yabtelinojic ti loc'obbaile, xchi'uc ti buch'u nijil chimilic ta yich'el ta muq'ue.

⁹ Pato avo'ntonic ta stojol ti Diose, israeletic. Ja' ta xiscoltaotic, ta xispojotic.

¹⁰ Pato avo'ntonic ta stojol ti Diose, paleetic. Ja' ta xiscoltaotic, ta xispojotic.

¹¹ Ti ta xavich'ic ta muc' ti Dios une, ¡pato avo'ntonic ta stojol! Ja' ta xiscoltaotic, ta xispojotic.

¹² Laj svulesotic ta yo'nton ma' ti Dios une, ta sva'an sba ta jtojoltic. Ta sva'an sba ta stojol ti israeletique, xchi'uc ta stojol ti paleetique.

¹³ Ta biq'uit ta muc', ta sva'an sba ta stojol mi ta x'ich'e ta muq'ue.

¹⁴ Ti vo'oxuque, xchi'uc ti avalab anich'nabique, ac'o xayepajesboxuc anitilulic ti Diose.

¹⁵ Ac'o sva'an sba ta atojolic ti Diose, ti Buch'u laj smeltsan ti vinajele, ti banomile.

¹⁶ Ti vinajel une, c'otem ta yu'un ti Diose, ti banomile, ac'bat sventain ti vinique.

¹⁷ Ti buch'u chamic xae, ti bat xa ta muquele, mu xa cha'bel xalbeic slequilal ti Diose.

¹⁸ Tanae, sbateluc osil, calbetic ti slequilale. Jun yutsil ta j'ech'el ma' ti Diose.