Salmos 114 - Bible in Tzotzil de Chamula

Svulesel ta o'ntonal ti loq'uel talel ta Egiptoe

¹ Ti Israel snitilultac ti Jacobe, c'alal loq'uic talel ta Egipto ti oyic to ox ta yan lume,

² ti Dios une, c'ot ta naquiel ta yosilal ti Judae. Ti Israele, ventainbil lec c'ot yu'un.

³ Jatav ech'el ma' ti nab c'alal laj yil ti Israele; valopat sut ma' ti uc'um Jordane.

⁴ Ti muc'tiquil vits xchi'uc ti stselejaltique, xbitic no'ox liquel jech c'u cha'al ti chijetique, ti mimi'etique.

⁵ ¿C'usi laj apas un, nab, lajatave? ¿C'usi laj apas un, uc'um Jordán, ti valopat lasute?

⁶ ¿C'usi laj apasic un, muc'tiquil vits, xchi'uc stselejal, ti xabitic no'ox liquel jech c'u cha'al ti chijetique, ti mimi'etique?

⁷ Banomil, nican ta xi'el ta sba ta sat ti Dios yu'un ti Jacobe.

⁸ Ti lican ch'entique, laj sjoybin ta sts'anleb nabetic. Ti muc'tiquil tonetique, laj sjoybin ta tuquem vo'.