Salmos 111 - Bible in Tzotzil de Chamula

Yalbel sc'oplal ti jun yutsil ta xc'ot ta pasel yu'un ti Diose

¹ Jun no'ox yutsil ta j'ech'el ma' ti Dios une. Ta sjunul co'nton ta xcalbe slequilal Dios ta tsoblebal yu'un ti buch'utic lec yo'ntonique, xchi'uc ta stojol scotol ti jnaclejetique.

² Muc'tic ta j'ech'el yabtel ti Dios une; ti buch'u mu tuch'baj ta yo'nton ta xa'iique, ta snopilanic lec un.

³ Jun yutsil, xojobin no'ox ta j'ech'el ma' ti yabtele; staoj yav ta j'ech'el ti slequil yo'nton ta xchapanvane.

⁴ Ti c'usitic jun yutsil laj spase, bejel o ta o'ntonal ta xc'ot. Jun yutsil, oy sts'iquemal xcuchemal yu'un ti Diose.

⁵ Ti buch'u sna' snijan sbaic ta stojole, ta xac'be ti sve'elique; ta svules ta yo'nton ma' ti c'u s'elan yaloj ti stratee.

⁶ Laj yac'be yil steclumal ti muc'tic no'ox ti yabtel laj spase; laj yac'anbe yich'ic ti c'u yepal ja' yu'unic ti yan yajvalique.

⁷ Sc'oteb o ti c'usi ta spase, tuc' ta j'ech'el, melel ono'ox; stac' jpat co'ntontic ta sventa ti smantaltaque.

⁸ Staoj yav sbatel osil ti mu stselbuj jutebuque; melel ono'ox un, mu nacauc nopbil ti c'ot ta meltsanele.

⁹ Ti Ch'ul Dios ti xi'bal sbae, c'ot ta pasel yu'un ti strate ti yaloje, laj scolta ti steclumale.

¹⁰ Ti bijilile ta xich' tael yu'un ti xi'tabiluc ti Diose; ti buch'u ta xi'tae, oy lec snopbenal yu'un un. Lequil c'optabil sbatel osil ti Diose.