Salmos 109 - Bible in Tzotzil de Chamula

Sva'anuc sba ti Banquilal jchapanvanej ta spaquel spuxel ti c'ope

¹ Ch'ul Dios, mu ts'ijiluc no'ox aq'ueloj ti xivocolet ta ac'oponel ati'inele.

² Yu'un oy jutc'opetic mu'yuc xch'ulel xa'i sbaic ta bet'bunel yeic ta soquesel ti jc'oplale, ti naca yesomal sjolic ti c'usi ta xalic ta jtojole.

³ Ta sc'ac'al xa yo'ntonic ta xtal svoliicun, ti mu'yuc c'usi jpasojbeic ta xtal stsaquicun ta leto une.

⁴ Ti spacol ta xiyac'beicun yu'un ti xc'uxul co'nton ta stojolique, ta xistsaquicun ta leto, le' une, ta xic'opoj xiti'in ec un.

⁵ Ta chopol ta xispacbeicun sutel ti c'usi lec laj jpasbeique; ta sti'emal xa sjolic ta xispacbeic sutel ti laj xc'uxubinique.

⁶ Ti buch'u mu'yuc xch'ulel xa'i sbae, c'otuc ta jchapanvanej yu'un, ta sbauc stuc, joybijuc ti yajc'opojele.

⁷ Tabatuc smul c'alal yacal ta xich' chapanele; cajaluc c'otuc ta sba ti c'u s'elan ye sti' ta spac ti sc'oplal yaloje.

⁸ Cuxiuc to batel c'uc sjaliluc un, va'iuc yan yajval ti c'usitic oy x'ayan yu'une.

⁹ C'oticuc ta ic'al me'unal ya'iic ti yalab xnich'nabe, c'otuc ya'i ta me'unal ants ti yajnile.

¹⁰ Yalel muyeluc ya'i ti yalab xnich'nab ta sc'anel ti uni limoxnae. Sjipicuc loq'uel ta slomemal naique.

¹¹ Ich'batuc batel yu'un j'ac'-ch'om taq'uin scotol ti c'usitic x'ayan yu'une. Tsobbatuc batel ya'i yu'un jyanlum slubel xchamel ti yoc sc'obe.

¹² Lajuc sc'oplal ti oy to buch'u ta xc'uxubaj yo'nton yu'une, mi ja'uc ti yalab xnich'nab busul comique.

¹³ Tubuc sc'oplal ta j'ech'el ti sts'unubale, ch'ayuc o sc'oplal ta alel ti sjol sbie.

¹⁴ Svulesuc ta yo'nton Dios ti mu'yuc xch'ulel xa'i sbaic ti stotique, ti j'ech'el cuxuluc o smul ti sme'ique.

¹⁵ Q'uelbiluc o yu'un Dios ti c'u s'elan ech'e, ch'ayuc ta banomil ta yalilanbel ti sc'oplale.

¹⁶ Mu'yuc xc'ot ta sjol ta yo'nton ta xc'uxubinel ti me'un mu'nate; ti buch'utic biq'uit yac'oj sbaique, xchi'uc ti buch'u ilbajinbilique, xbitet no'ox ta snutsel ti ts'ij xi sc'oplal yu'une.

¹⁷ Ti lec laj ya'i ti bisvan ta cotol chavale, biseuc ta cotol chaval ec un. Ti mu tsotsuc sc'oplal laj ya'i laj yac' ti lequilale, loc'uc o batel ta stojol ti lequilal ec une.

¹⁸ Lamluc c'otuc ya'i ta sba ti bisvanem ta cotol chaval jech c'u cha'al ta slapel ti c'u'ile, sc'upinuc ya'i ec un co'oluc s'elan vo' mi aceite, tanijuc batel ta sbec'tal ta syolil sbaquil.

¹⁹ Co'oluc s'elan sc'u' pixil c'otuc xchi'uc, ti co'oluc s'elan junuc chuquil tsinuc sba ti svocol une.

²⁰ Jech ta xtojbatic yu'un Dios ti jcontrataque, xchi'uc ti buch'u xbet'bun no'ox yeic ta xchopol c'optaelune.

²¹ Le' une, Cajval, ich'biluc ta muc' c'otan un, ti lecuc xavilune. Pojun ta sventa ti alequile, ti syail xc'uxul avo'ntone.

²² Me'un mu'natun, ilbajinbilun, yayijem ma' ti co'ntone.

²³ Ta xa xibat jech c'u cha'al xtemet batel ti queove, cuchbilun batel yu'un ic' jech c'u cha'al ti c'ulube.

²⁴ Ti mu'yuc xa ti ve'el une, xnicnun xa ti cacane, bacunebun xa ta scoj ti mu xyal ti ve'ele.

²⁵ Lic'ot ta j'ac'-tse'ej yu'un ma' ti jnaclejetique. Sjimolan xa sjolic ta xlabanvanic c'alal ta xiyilique.

²⁶ Coltaun, Cajval Dios, pojun ta sventa ti syail xc'uxul avo'nton une.

²⁷ Sna'icuc un, Dios, ti ja' avabtel ti va'i s'elan taj une.

²⁸ Mu labluc xca'i mi bisbilun ta cotol chavale, ipaluc lec ti jc'oplal avu'une. Aq'ueuc ta q'uexlal stuquic c'alal xmuyubaj no'ox ti avajtunele.

²⁹ Nijilicuc ta q'uexlal ti jcontrataque. Lamluc c'otuc ta stojolic ti q'uexlale jech c'u cha'al ti axibale.

³⁰ Mu xlaj ta alel ta que ta jti' ta yalbel coliyal ti Diose; ta xcalbe slequilal ta sba ta sat ti epal jnaclejetique.

³¹ Ta sva'an sba ta j'et'esej-c'op yu'un ti me'un mu'nate; ta scolta ti buch'u chapal xa sc'oplal jbel ta xich'e.