Salmos 108 - Bible in Tzotzil de Chamula

Jchapanoj jba ta j'ech'el

¹ Jchapanoj jba ta atojol, Cajval Dios, chapalun ta sq'uejintabelot q'uejimoletic. Cuxetuc banomil ta xava'i un, co'nton.

² Lometanic xa liquel un, arpaetic, jchop o ta vobetic, ti jmoj xa vololotic ta smalael ta sacub talel ti osile.

³ Ta xcalbot alequilal ta sventa q'uejimoletic, Cajval, ta stojol ti jteclumetique, ta stojol ti muc'tiquil lume.

⁴ Yu'un yepal ta j'ech'el ma' ti syail xc'uxul avo'ntone, mu sta ma' ti vinajel une. C'otem to c'alal yax ts'ijan vinajel ma' ti alequile.

⁵ Cajval Dios, chotol nacalot ta vinajel; nojem ta avutsilal alequilal scotol ti banomile.

⁶ Pojuncutic un ta sventa ti amuc'ul atsatsale yo' pojbil ta xc'ot ti buch'u mu xtuch' ta avo'ntone. Tac'buncutic ti jc'opojel jti'inelcutique.

⁷ Xi c'opoj talel ma' ti Dios ta xch'ulnae: “Ximuyubaj ta j'ech'el ta xquil ta jba ta jsat ta jch'ac ti Siqueme, ta jch'ac ti stenlejal Sucote.

⁸ Ti Galaade, ti Manasese, c'otemic ta cu'un. Ti Efraine, c'otem ta smac jol ta xca'i. Ti Judae, c'otem ta jvaxton ta sventa pasob mantal.

⁹ Ti Moab eque, c'otem ta yavil atinajebal bu ta jpoc ti coc' jc'obe; ta jipbe ech'el ya'iic jxonob ta sbaic ti Edome; xiq'uejin xa ti tsalbil ta xc'otic ti filisteoetique.”

¹⁰ ¿Buch'u xu' yu'un ta xiyic'un batel ta jteclum ti joyol lec ta moque? ¿Buch'u xu' yu'un ta xiyic' batel c'alal to Edom?

¹¹ Yu'un ti vo'ote, Ch'ul Dios, laj xa atenuncutic comel; ¡mu'yuc xa ta xachi'inuncutic loq'uel xchi'uc ti cajsoldadocutique!

¹² Coltauncutic ta stsalel ti jcontracutique; mu xu' yu'un ta spoj sba ta yip no'ox stuc ti vinique.

¹³ Ta sventa coltabiluncutic yu'un ti Diose, ep ta tos ti c'usitic muc'tic ta xc'ot ta pasel cu'uncutique; ta xpech' ta teq'uel ma' ti jcontracutic une.