Salmos 107 - Bible in Tzotzil de Chamula

LIBRO V (Salmos 107—150 ) Staoj yav syail xc'uxul yo'nton ma' ti Dios une

¹ Colaval, utic ti Diose, yu'un oy slequilal yo'nton, yu'un sbatel osil oy ti syail xc'uxul yo'ntone.

² Colaval, xiicuc ec ti buch'utic coltaatic yu'un ti Diose, ti pojatic ti mu'yuc x'ochic ta c'abal yu'un ti scontraique,

³ ti tsobeic talel ta muc'tiquil lum ti oy ta yolon yac'ol ti xocon sloq'ueb c'ac'ale, ti oy ta yolon ti yolon xocon sloq'ueb c'ac'ale, ti oy ta stuq'uil ti sloq'ueb c'ac'ale, ta stuq'uil ti smaleb c'ac'ale.

⁴ Ch'ayemic ta be ti xc'uletic ta xanobal ta yi'tic ta sbajtical banomil, ti mu staic ta sa'el ti be ta xc'ot ta jun jteclum ti bu xu' ta xnaquiique.

⁵ Mu x'ech' ti vi'nal laj ya'iique, xchi'uc ti taqui ti'ile, ti jset'uc xa mu chamique.

⁶ Lic yoq'uitaic Dios ti oyic ta vocol une, pojeic ti oyic ta vocole.

⁷ Ts'acal to un, tojobtasatic batel ta tuq'uil be ti ta xc'ot ta jun jteclum ti bu xu' ta xnaquiique.

⁸ Colaval, utic ti Dios ta sventa ti syail xc'uxul yo'ntone, ta sventa ti ta sva'an ta spojel ti jteclume.

⁹ Ta xac'be vo' yuch' ti buch'u ta xa'iic taqui ti'ile; ta snojesbe xch'ut ti buch'u ta xa'iic ti vi'nale.

¹⁰ Ic'uneb ma' ti osil banomil ta xa'iique; ochemic ta vul o'nton, chucbil ta carina,

¹¹ ta scoj ti laj scontrainic ti c'usitic yaloj ti Diose, ta scoj ti laj sbajic ti c'usi xchapanoj ta spas ti Buch'u oy ta toyole.

¹² Laj staic ilbajinel ta sventa tsots yabtel ti Diose, tacoltabilic, mu'yuc buch'u ta xcoltaatic yu'un.

¹³ Ti oyic ta vocol une, lic yoq'uitaic ti Diose, pojeic ti oyic ta vocol une.

¹⁴ Ti ic'uneb xa ti osil banomil ta xa'iique, coltaatic ti chucbilic ta carinae.

¹⁵ Colaval, utic ti Dios ta sventa ti syail xc'uxul yo'ntone, ta sventa ti ta sva'an sba ta spojel ti jteclume.

¹⁶ Laj slilin ti ti'naetic ti meltsanbil ta c'anal taq'uine. Laj slilin ti stsacleb yavietic meltsanbil ta tsatsal taq'uine.

¹⁷ Jchameletic, ilbajinbilic ta scoj ti mu'yuc xch'ulel xa'i sbaique, xchi'uc ta scoj ti smulique,

¹⁸ mu xa c'usi jtosuc ve'lilal xyal yu'unic, naca xa mu ta xpalch'ujic batel.

¹⁹ Ti oyic xa ta vocol une, yoq'uitaic ti Diose, pojeic yu'un ti oyic ta vocole.

²⁰ Ta sventa ti laj stac' sutel ti c'ope, toj poxtael c'otic, pojeic ti jbel xa sc'oplal muquinal xa sq'uelojic batele.

²¹ Colaval, utic ti Dios ta sventa ti syail xc'uxul yo'ntone, ta sventa ti ta sva'an sba ta spojel ti jteclume.

²² Ac'beic milbil matanal ta sventa ti coliyale, muyubajanic ta slo'iltael sc'oplal ti yabtel laj spase.

²³ Xcajetic no'ox ta nab xchi'uc sbarcoic ti jbolomajeletique, ti xpolet no'ox syuc'benal ta xictaic comel ti nabe.

²⁴ Ta yut ti nab une, laj yilbeic yutsil ti c'usitic smeltsanoj ti Diose.

²⁵ Lic banomilal vo' xchi'uc yic'al ta sventa sc'opojel ti Diose, ti natic no'ox xva'i xcoti syuc'benal ti nabe.

²⁶ Xchechetic no'ox muyel ta vinajel, mut'iatic yalel ta snabil ti nabe, tsic' yo'ntonic yu'un ti xi'el une.

²⁷ Xquiclajanic xa jech c'u cha'al ti jyacubeletique, mu'yuc c'usi xut sbaic xchi'uc ma' ti yuni bijilic une.

²⁸ Ti jech oyic ta vocole, lic yoq'uitaic ma' ti Diose, pojeic ti oyic ta vocol une.

²⁹ Joybij ta uni vajal vo' ti banomilal vo' xchi'uc ti tsots yic'ale, ts'ij xi ma' ti nab xva'i xcotie.

³⁰ Ti laj yilic ts'ij xi ti nabe, xcuxet xa banomil laj ya'iic. Iq'ueic batel yu'un Dios ti bu chapal sc'oplal ta xbatique.

³¹ Colaval, utic ti Dios ta sventa ti syail xc'uxul yo'ntone, ta sventa ti ta sva'an sba ta spojel ti yajval lumetique.

³² Albeic yutsilal c'alal ta stsob sbaic ti jteclume. Albeic slequil c'alal volol stsobolic ti moletic ich'bil ye sti'ique.

³³ Ta sbajtical banomil xchi'uc ta staquinale, ti Diose ta xac' t'omuc talel uc'umetic, xchi'uc sat vo'etic.

³⁴ Ti ve'ebal banomile, ta sjoybin ta quechtic ta scoj smulic ti jnaclejetique.

³⁵ Ta sbajtical banomile, ta sjoybin ta sts'anleb bic'tal nabetic, ta tuq'uemal vo' ti staquinal banomile.

³⁶ Ti bu taje, ta xlic naquiuc yu'un ti buch'u ta xa'iic vi'nale, ta xlic c'otuc ta jun jteclum yu'unic.

³⁷ Ta xlic sts'unic uva sbeel ti osil banomil une, yepal no'ox ta staic ta tsobel ti sat ts'unubale.

³⁸ Ta sva'an sba ta c'uxubinvanej, ta xc'ot ta pasel ti lec ta xch'ie, ta x'epaj ti xchon sbolomic yu'une.

³⁹ Mi ta xlic chamicuque, xchi'uc mi ta xjutebajic ta scoj ti ilbajinele, ti bac vocol ta xvul ta stojolic ti mu x'ech' yipal ta xa'iique,

⁴⁰ ti Dios une ta sjip ta sten ma' ti j'ilbajinvanejetique. Ta xc'otic ta ch'ayel ta sbajtical banomil ti mu sna' bu ta xbatic yu'une.

⁴¹ Ta sta jun yo'ntonic yu'un ti buch'u abol sba ta at-o'ntone, co'ol s'elan junuc chij ta xlic yepajesbe ti yalab xnich'nabe.

⁴² C'alal jech ta xilic ti viniquetic ti oy stuq'uil sjol yo'ntonique, xpatet xa yo'ntonic ta xa'iic un; mu xa jbeluc xc'opoj ma' ti buch'u mu'yuc xch'ulel xa'i sbaic une.

⁴³ Ti buch'u oy sbijil xa'i sbae, bejeluc ta yo'nton ti va'i s'elan taje, ya'iuc lec syail xc'uxul yo'nton ti Dios une.