Salmos 103 - Bible in Tzotzil de Chamula

Ta jlequil-c'opta ma' ti Dios une

¹ Ta sjunul jch'ulel canima, ta xcalbe slequilal ti Diose; ta sventa ti yutsil slequilale, ta sjunul co'nton, ta jlequil-c'opta un.

² Ta sjunul jch'ulel canima, ta xcalbe slequilal yutsilal Dios, ti mu jtosuc ta xch'ay ta co'nton ti c'usitic lec spasojbune.

³ Laj stub laj xch'aybun scotol ti jmul jcolo'e, ta xpoxtabun scotol ti jchamele,

⁴ ti Buch'u mu to ta xibat yu'un ta muquinale, ti Buch'u ech'em xa no'ox syail xc'uxul yo'nton ta xc'uxubinune.

⁵ Ta xac'bun scotol ti c'usitic ta xtun yo' lec oyune, ta xiqueremaj yu'un jech c'u cha'al ta xjel sc'uc'umal ti xic une.

⁶ Ti Diose, ta lequilal ta xchapan ti buch'utic ilbajinbilique.

⁷ Ti beetic yu'une xchi'uc ti c'usitic ta spase, laj yac' iluc ta stojol ti Moisese xchi'uc ta stojol ti jteclum Israele.

⁸ Ti Diose mu xtuch'van ta o'ntonal, mu'yuc x'ictavan, mu'yuc spajeb ti syail xc'uxul yo'ntone, oy sts'iquemal yu'un.

⁹ Mu scotoluc c'ac'al tsacbilotic ta c'op yu'un; mu yaleluc sq'uejoj ti sti'emal scapemale.

¹⁰ Mu'yuc sbusanoj ta jbatic ta stojel ti xijtun o ta yich'el ta scoj ti jtoyobbailtique, ti jmultique.

¹¹ Jech c'u cha'al sjamalil ti vinajel oy ta banomile, jech yepal ti syail xc'uxul yo'nton ta stojol ti buch'utic ta xich'ic ta muc' une.

¹² Ti jmul jcolo'tique, nom laj sten loq'uel jech c'u cha'al nom xil sbaic ti sloq'ueb c'ac'al xchi'uc ti smaleb c'ac'ale.

¹³ Jech stalel ma' ti Dios ta stojol ti buch'utic ta xich'ic ta muq'ue, co'ol s'elan jech c'u cha'al junuc totil ti oy sts'iquemal xcuchemal yu'un ta stojol ti xnich'nabe.

¹⁴ Xojtiquin ti xi s'elan meltsanbilotique: sna' lec ti lum ach'elotique.

¹⁵ Xcuxlej ti buch'uuc no'oxe, co'ol s'elan jech c'u cha'al ti momole, ti xi s'elan ta xvul ta javel jech c'u cha'al ti te'tical nichime:

¹⁶ C'alal ta xlic majeuc ta iq'ue, tsuts o ti sc'oplale, mu'yuc xa ta svulesat ta o'ntonal un.

¹⁷ Ta sventaic ti buch'utic ta xich'ic ta muc' ti Dios une, staoj yav sbatel osil oy ti syail xc'uxul yo'nton ta stojolique; mu'yuc spajeb stuq'uil yo'nton ta stojol scotol ti sjay-q'uexelal chlaj ech'icuc une,

¹⁸ ti buch'utic ta xc'ot ta pasel yu'unic ti c'u s'elan yaloj ti stratee, xchi'uc ti buch'utic mu sjip ta spat ta xoconic ti smantaltac une.

¹⁹ Ti Diose, ta vinajel chotol ta spas mantal, yu'un sbainoj ta sventainel scotol.

²⁰ Ánjeletic ti jelavem xu' avu'unique, lequil-c'optaic ti Diose, ti ta xc'ot ta pasel avu'unic ti c'u s'elan ta xalboxuque, ti chapalucoxuc ta xch'unbel une.

²¹ Acotolic ti svinic c'otemoxuque, lequil-c'optaic ti Diose, ti avac'oj abaic ta tunel yu'une, ti ta xapasic c'usi sc'an yo'ntone.

²² Acotolic ti meltsanbiloxuc yu'une, ti bu xa c'alal smacoj ta ventainele, lequil-c'optaic ti Diose. Ta sjunul jch'ulel canima, ta jlequil-copta ma' ti Diose.