Salmos 102 - Bible in Tzotzil de Chamula

Sc'opojel sti'inel ti buch'u ilbajinbile

¹ A'yibun ti jc'opojel jti'inele, Cajval, ac'o ave ati' ti c'otuc ta atojol ti xi'oc' xi'avan une.

² Mu xajoybin asat ta jtojol c'alal oyun ta ilbajinele; ch'ul abolajan, ts'etano achiquin cu'un, ta jech yepaluc, tac'bun no'ox talel c'alal xivocolet une.

³ Ta xa xtub ti jcuxlej jech c'u cha'al ti ch'ail ta sac ch'ay batele; cajtsajem sc'ac'al ti jbaquiltac jech c'u cha'al ta xtil ti ac'ale.

⁴ Naca xa tsacal ti co'nton jech c'u cha'al yacal ta nucultajel ti momole; mu xa xyal ti ve'el une.

⁵ Spac'oj xa sba ti jnuculil ta jbaquil ta scoj ti mu'yuc spajeb ti oq'uele.

⁶ Co'ol j'elan jech c'u cha'al junuc cux-cux ta sbajtical banomil, co'ol j'elan jech c'u cha'al junuc mutal bolom xluchet ta yav lomemal naetique.

⁷ Mu'yuc ma' ti vayel une. Co'ol j'elan jech c'u cha'al yo' jcot junomal mut xluchet ta jol nae.

⁸ Mu'yuc spajeb quilbajinel yu'un ti cajcontrataque; xbet'bun no'ox yeic ta yalel jc'oplal sbiselun ta cotol chaval.

⁹ Ja' xa c'otem ta jve'el ti naca tan ta jvijbe capal ta ya'lel jsat ta xbat ti c'usi ta xcuch'e

¹⁰ Ta scoj ti xac'aq'uet no'ox la'ilin ta acapemale, nom to c'ot ti quich'el ta muc' avu'une.

¹¹ Co'ol s'elan queov xtemet no'ox batel ti jcuxleje, yantic xi'u'nine ta bajel jech c'u cha'al ta xnucultaj ti momole.

¹² Ti vo'ot une, Cajval, sbatel osil ta xaventainvan; sbatel osil ta ono'ox xich' alilanel ti ac'oplale.

¹³ Va'lan tec'lan un cha'e, c'uxubajan yu'un ti jteclum Sione; sta xa sc'ac'alil un, yorail xa ta xach'aybe ti smul scolo'e.

¹⁴ Ti avajtuneltaque, mu tuch'baj ta yo'nton ta xa'iic ti tonetique; xbiet yo'nton ta xa'iic ti busul ta lumtic ti xch'uch'ulile.

¹⁵ Scotol ti muc'tiquil lume, xchi'uc ti ajvaliletic ta banomile, xi'bil, ich'bil ta muc' ta xc'ot yu'unic yutsilal slequilal ti Diose.

¹⁶ C'alal ta xlic xcha'va'an ti jteclum Sione, ta xlic vinajuc ti yutsilal slequilal une.

¹⁷ C'alal ta xlic xchiquintabe sc'opojel sti'inel ti buch'u jipbil tenbil xa ta xa'iique, mu ta jeche'uc no'ox ma' ti xvocoletique.

¹⁸ Taj une, ts'ibabil comuc ta sventaic ti ts'acal jch'iel jc'opojele, xchi'uc ti buch'u ta to xvoq'uic talele, yo' jech ta xalbeic slequilal yutsilal ti Diose.

¹⁹ Ti Diose, ta vinajel to, laj sq'uel talel ti banomile, ta xch'ul lequilal to ti oy ta toyole,

²⁰ ta xa'ibe sc'opic ti jchuqueletic x'oc' x'avanique, xchi'uc ta spojel ti buch'utic chapal xa sc'oplal ta xich'ic milele.

²¹ Jech ta xlic vinajesbatuc sc'oplal un, ti lequil c'optabil ta xc'ot ti Dios ta Sione, ti ta Jerusalene,

²² ti vololic ti jnaclejetic ta xich'ic ta muq'ue.

²³ Ti vu'une, ta o'lol be laj xtuch'bun ti quipe; laj stsules ti c'u snatil ti jcuxleje.

²⁴ Xichi laj calbe une: “Cajval, Dios, mu to xavic'un batel ti o'lol be to ti jch'iel jc'opojele.” Mu'yuc sjabilal mu'yuc spajeb ti acuxlejale.

²⁵ Ta sliquebal no'ox, laj achotan lec ti banomile, laj ameltsan ti vinajel une.

²⁶ Scotol taj une, ta xlaj sc'oplal; ti vo'ot une, staoj yav cuxulot o. Scotolic taj une, ta xlic lajuc jech c'u cha'al ti c'u'ile; vo'ot ta xaq'uexta yo' jech jelbil ta xc'ot jech c'u cha'al ti buch'u ta sjelta ti sc'u'e.

²⁷ Ataoj avav ma' ti vo'ot une; mu'yuc stsutseb ma' ti ajabilale.

²⁸ J'ech'el ta stsinan lec yo'ntonic avu'un snitilul ti avajtuneltaque, ta atojol atuc ta xavac' naquiicuc un.