Salmos 1 - Bible in Tzotzil de Chamula

LIBRO I (Salmos 1—41 ) Ti muyubajel ta j'ech'ele

¹ Xmuyubaj no'ox ta j'ech'el ti buch'u mu'yuc laj xch'unbe sc'op ya'yej ti buch'u mu'yuc xch'ulel xa'i sbaique, ti ma'uc laj stam batel bu stamojic ti jsa'muliletique, ti ma'uc laj sco'oltas yo'ntonic xchi'uc ti buch'utic ta slabanic ti Diose,

² ti c'ajomal no'ox laj syales ti syail xc'uxul yo'nton ta xch'unel ti oy c'usi jbel tsots yaloj ti Diose, ti yacal ta snopilanel ta c'ac'al ac'ubale.

³ Ti buch'u jech ta snopilan taje, co'ol s'elan jpets te' teq'uel ta ti' uc'ume, ti ta yorail no'ox ta xac' ti sate, ti j'ech'el mu xnucultaj ti yanaltaque. Scotol ti c'usi ta spase, lec ta xc'ot ta loq'uel yu'un.

⁴ Ti buch'u mu'yuc xch'ulel xa'i sbaique, mu jechuc ta xc'ot ta stojolic une, co'ol s'elan jobel cuchbil ta xbat ta ic'.

⁵ Jech o xal ti buch'u mu'yuc xch'ulel xa'i sbaique, mu staic ti ta lequilal ta xchapaj ti sc'oplalique; ti Jsa'muliletique mu'yuc sc'oplal ta x'ochic ti bu svoloj sbaic ti xa'ibeic sni' xchiquinale.

⁶ Ti buch'utic xa'ibe sni' xchiquinale, chabibil yu'un Dios ta sbe xaneb; yan ti bu stamojic batel ti buch'u mu'yuc xch'ulel xa'i sbaique, ch'ayel xal o.