Proverbios 8 - Bible in Tzotzil de Chamula

Slo'il ya'yej ti bijilile

¹ Ti bu xa xu' yu'une, ta x'avan ma' ti bijilile; ta svinajes sc'opojel ma' ti snopbenale.

² Ta toyol stselej ta sva'an sba, vechel ti bu ta xch'ac sba ti bee.

³ Xi ta svinajes ta a'yiel ta ti' ochebal yu'un ti jteclume:

⁴ “Ta aventa, viniquetic, ta xc'ot ta ani' achiquinic ti jc'op ca'yeje.

⁵ Querem viniquetic ti mu xava'i abaique xchi'uc ti pimuneboxuque, ich'o abaic ta c'ac'al, a'yibeic lec xchiquinal.

⁶ Chiquintaic o ava'iic ti ca'yej ta xcale, yu'un tsots sc'oplal, spajeb ti yutsile.

⁷ Melel ma' ti c'usi ta xcale, ma'uc jutbil.

⁸ Scotol ti c'u s'elan ta xcale, oy stuq'uil; ma'uc ma' ti naca yesomal jolale.

⁹ Ti buch'u oy sbijilic une xchi'uc ti xa'ibeic xchiquinale, xvinaj ti c'usi ta xcale, mi ja'uc macal ta xa'iic.

¹⁰ Ta xc'ot ta yo'ntonic, ta sc'an ta sna'ic ti tojobtasaticuc yu'une, mu sta sc'oplal ta xa'iic ti platae xchi'uc ti t'ujbil oroe.”

¹¹ Ti bijilile, tsots sc'oplal, ja' mu sta sc'oplal ti c'upil sba bax-tone; mi ja'uc stac' co'oltasel xchi'uc ti c'usi c'upil sba xbat o ti o'ntonal yu'une.

¹² “Ti bijilil une mu yanucun xchi'uc ti snopbenale, xtal no'ox ta jol ta yalel ti lequil bijubtasele.

¹³ Ti xi'tabil ta xc'ot ti Diose, contrainbil xa c'ot ti c'usi chopole. Jcontra ta xquil ti toyobbaile, ti bichobbaile, ti yan o tambil batele, xchi'uc ti naca jutbile.

¹⁴ Ta xc'ot ta pasel cu'un ti c'usi jnopoje, oy jmuc'ul jtsatsal, tuc' ti snopbenal cu'une.

¹⁵ Coliyal ti vu'un ta jventa sbejanojic sc'oplal lequilal ti banquilal ajvaliletique xchi'uc ti its'inal ajvaliletique.

¹⁶ Colyal ti vu'un ta jventa ch'unbil ta xc'ot smantal ti banquilaletic ta jujun lume, ti jbel xal c'u s'elan ta xchapaj yu'un ti j'opisialetique.

¹⁷ Mu tuch'baj ta xca'i ti buch'u mu tuch'baj ta xiya'iique; ta xistaic ta sa'el ti buch'u ta xisa'icune.

¹⁸ Oy ta jventa ta yaq'uel ti c'ulejale xchi'uc ti ich'el ta muq'ue, ti spajeb xa no'ox ta j'ech'ele, xchi'uc ti c'usitic lec ta xc'ot ta pasele.

¹⁹ Ti c'usi ta xcaq'ue, x'ech' to yutsil, ja' mu sta ti lequil oroe; x'ech' to yutsil ma' ti c'usi ta xcaq'ue, ja' mu sta yutsil ti t'ujbil platae.

²⁰ Jtamoj batel ma' ti tuq'uil bee, sbelel ti lequilale.

²¹ Ti buch'u mu tuch'baj ta xiya'ie, xi s'elan ta xcac'beique: ta jnojesbe ta sc'ulejal ti snaique.

²² “Ti Diose yac'ojbun xa ono'ox jch'ulel canima c'alal mu'yuc to ox ta sliques ti yabtele.

²³ Ta sliquebal ono'ox, laj yac'bun jch'ulel canima c'alal mu'yuc to ox smeltsanoj ti banomile.

²⁴ Oyun xa ono'ox c'alal mu'yuc to ox ayanem ti muc'tiquil nabe, c'alal mu'yuc to ox ta xtuc talel ti uc'umetique, xchi'uc ti sat vo'etique.

²⁵ C'alal mu'yuc to ox ti vitsetique, xchi'uc ti muc'tiquil te'tique, oyun xa ono'ox ta sba ta sat ti Dios une.

²⁶ C'alal mu'yuc to ox meltsajem ti osil banomile, xchi'uc ti c'usitic sventa yo' ta smeltsan ti osil banomile, oyun xa ono'ox un.

²⁷ C'alal lic smeltsanan scot-cotil vinajel ti cuchbil yu'un ti muc' ta nabe, oyun xa ono'ox un.

²⁸ C'alal lic ayanuc yu'un ti toc ta vinajele, c'alal laj smeltsan yoctac bu ta xanav ti muc' ta nabe,

²⁹ c'alal laj yalbe mantal ti nab bu xc'ot ta pajel ti snojemale, c'alal laj yac'be stsacleb yic ti banomile,

³⁰ j'ech'el jun co'nton nabalun ta sts'el. Staoj ma' ti xmuyubaj yo'nton cu'une, ti xibitet no'ox ta tajimol ta stojole,

³¹ xitajin no'ox xchi'uc ti banomil meltsanbil yu'une, ximuyubaj no'ox yu'un ti jnaclejetic ta banomil une.

³² “Tana li'e, cuni nich'nabtac, ts'etano ti avuni chiquinique, tamic batel ti bu jtamoj batel yo' jech mu'yuc c'usi xana'ic.

³³ Ich'ic ta muc' ti tojobtasele, mu xajip xaten ti bijilile.

³⁴ Mu'yuc c'usi sna' ma' ti buch'u ta xchiquinta c'usi ta xcale, ti jujun c'ac'al stuc'ulanoj ti sti' jnae.

³⁵ Ti buch'u ta sa'une, ta sta ti xcuxleje, ta sta ti lec x'ile yu'un ti Diose.

³⁶ Yan ti buch'u ta xch'ac sbaic ta jtojole, xi'bal xa sba xac' o ti sjol sbaquil xchi'uque; lajebal ta sc'upin ya'i ti buch'u xti'et sjol ta jtojole.”