Proverbios 6 - Bible in Tzotzil de Chamula

Sbijubtasel ti buch'u ta sva'an sba ta piarole

¹ Cuni nich'on, mi ta xava'an aba ta piarolil ta sventa ti buch'u lec xavile, mi ja' ti xavac' xa ave ta xava'an aba ta sventa ti yane,

² xi s'elan ti laj atic' aba ta pets'e: ta ave no'ox atuc laj achuc aba un.

³ Xi s'elan sc'an xapas ta scoltael aba ti oyot xa ta yoc ta sc'ob ti yane, cuni nich'on: bic'tajeso aba yu'un ti atoyobbaile, cha'chapanic ti buch'u lec xavil aba xchi'uque.

⁴ Ma'uc no'ox ti ch'an xachie, ma'uc ti telelot xa ta xacux avo'ntone,

⁵ co'oluc a'elan te'tical chij ti spoj sba yu'un ti jnutsuvile, pojo aba jech c'u cha'al junuc mut ti ch'ambil ta xc'ot ta pets'e.

Stuq'uibtaselic ti buch'u ch'ajunebique

⁶ Lican, va'lan, ch'ajil vinic, tuc'ulano avil lec, c'otuc ta ajol ti xi s'elan ta spasic ti jinich'e:

⁷ Manchuc mi mu'yuc buch'u ta spasun ta mantal, mi mu'yuc buch'u ta x'albat yu'un ti c'usi spase,

⁸ ta scaj-tsob sve'el c'alal yorail ti q'uepelale, ta sbusan ta tsobel sve'el c'alal yorail ta xloc' ti ts'unubale.

⁹ Ta'luc o ti vayel ta xapase, ch'ajil vinic. Ta'luc o ti puch'ulot no'oxe.

¹⁰ Ti xvaichinaj no'ox ta xava'i ti banomile, ti xanijnun ta vayele, ti ameyoj avoc ac'ob ta xacuxe,

¹¹ ta xtal ti ame'unal amu'til ta yaq'uel ti avocole, co'ol s'elan j'ech'el-be vinic chapal lec xchi'uc ti yabtejebe.

Stalelic ti buch'u mu'yuc xch'ulel xa'i sbaique

¹² Ti buch'u spajebal o ti mu'yuc xch'ulel xa'i sbae, yeinoj ta yalel ti naca jutbil c'ope,

¹³ stse'in no'ox sat yilel, xvechechet no'ox ta spas sba, xbichet sni' sc'ob ta ch'utubtavanej,

¹⁴ soquem ti snopbenal yu'une, oy no'ox ta yo'nton ta spasel ti c'usi chopole, sa'sun no'ox ta c'op ta sliquesel leto.

¹⁵ Jech o xal un, mu ta sjaliluc ta sta ti svocole; ta jviq'uel jmuts'el satil, tsutsem ti c'usi oy yu'une.

Ti c'usi mu lecuc ta xil ti Diose

¹⁶ Oy vuctos ti xi s'elan mu lecuc ta xil ti Dios ta j'ech'ele:

¹⁷ ti xnelet no'ox ti satile, ti xbet'bun no'ox eil ta sjutel c'ope, ti xyal no'ox c'abal ta smilel ti buch'u ch'abal smule,

¹⁸ ti xnopnun no'ox jolil ta snopel ti c'usi chopole, ti xbitet ti ac'anil ta spasel ti chopole,

¹⁹ ti ta jech yepal ta sva'an sba ta rextico ta sjutel ti c'ope, ti jliquesej c'op ta stojol ti svinquileltaque.

Ti stojol ta sta ti buch'u ta xyalic ta mulile

²⁰ Cuni nich'on, bejluc ta ajol ti mantaletique, xchi'uc ti chanubtasel laj yalbot ti atot ame'e.

²¹ Bejbunuc ta avo'nton, uino batel ta yalel muyel.

²² Ta stojobtasot ti buyuc no'ox ta xabat ta xanvile, chi'inbilot chabibilot yu'un ta xavay, xaschi'in xa ta lo'il mi lajulave.

²³ Melel un, ti mantaletique, ti chanubtasele, c'otem ta lampara sac jaman ti yutsile; ti tojobtasel une, ti bijubtasele, j'ic'vanej ta sventa cuxlejal.

²⁴ Ta spojot yo' mu xa'och ta sc'ob ti ants mu'yuc xch'ulel xa'i sbae, ti vo' xa ya'yel ye ti jovil antse.

²⁵ Mu aq'uelojuc aba ta xbic'taj avo'nton yu'un ti sc'upilale, ti ava'binoj aba yu'un ti stse'et ta spase.

²⁶ Ta juteb no'ox ve'lil, ta sbolomalin sba ti antse, ja'uc ti ants oy yajval sna' xac' sbae, oy ta yo'nton ta xu'ninbe yo'nton ti buch'u xloc' venta ta xile.

²⁷ Ti buch'u ta snaban c'oc' ta sti' yo'ntone, jbel sc'oplal ta xc'ac' ma' ti sc'u'e.

²⁸ Ti buch'u ta xanav ta sba ac'ale, ta xc'ac' ma' ti yacane.

²⁹ Ti buch'u ta xyaque yu'un ti jovil antse, jbel sc'oplal ta stoj lec.

³⁰ Stac' to sts'icbel jutuc sbolil ti j'elec' ta x'elc'aj yo' ta snojes ti xch'ute.

³¹ Manchuc mi yacal ta x'elc'aj ta staic, sna'ojic ti ta sutes vucub velta ti c'u yepal laj yelc'ane, manchuc mi ta stsob scotol ti c'u yepal oy ta sna une.

³² Ch'abal xa no'ox xch'ulel ta j'ech'el ti buch'u co'ol xa sbaic xchi'uc ti jovil ants ti oy yajvale, ti buch'u jech ta spas taj une, ta soques sba stuc.

³³ Ta sta contrainel, ta sta majel, j'ech'el mu'yuc c'usi xut sba ta stubbel ti xchopolale.

³⁴ Ti liquem xa yit'ixal yo'nton ti vinique, co'ol s'elan junuc c'oc', tiq'uil o ta yo'nton ta spac sutel ti xq'uexe.

³⁵ Mi ta to slajesbat ti yo'ntone, mu xa xac' ta venta; mu xlamaj yo'nton manchuc mi ta x'ac'bat epal matanal.