Proverbios 5 - Bible in Tzotzil de Chamula

Ch'ayel xal o ti bu lec xa xa'i ti antse

¹ Ac'o ta aventa ti bijubtasel ta xcale, cuni nich'on; ts'etano achiquin yu'un ti c'u s'elan laj yac' ana' ti jbijile.

² Ta xana' ti c'u s'elan ta xavich' aba ta c'ac'ale, ta sna'el ti c'usi ta xavale.

³ Yu'un ti jovil antse, chi' xa ta lajesel ya'yel ti c'usi ta xale, co'ol s'elan vo' ya'yel ma' ti ye sti'e, ja' mu sta yutsil ti aceitee.

⁴ Le' une, ta xc'ot ta pasel yu'un ti mu x'ech' xjelav ta xac' ti vocole, ja' mu sta yipal ta syayijesvan ti espada cha'jot yee.

⁵ Ch'ayel xa xal o ma' ti jmoj ta xaxanav xchi'uque; muquinal xa xal o ma' ti bu stamoj batel une.

⁶ Mu tsotsuc sc'oplal ta xa'i ta stamel batel sbelel ti xcuxlejale, mi ja'uc ta stuc'ulan ti chopol bu stamoj batele.

⁷ Le' une, cuni nich'on, ich'o ta muc' ti jc'op ca'yeje, mu xaten xabaj ti c'u s'elan laj jchanubtasote.

⁸ Ma'uc xbat avo'nton yu'un ti jovil antse; j'ech'eluc mu xanopaj batel ta sti' sna,

⁹ yo' jech mu xatubbe yutsil ti ach'iel ac'opojel ta yoc ta sc'ob ti j'ac'vanejetic ta vocole,

¹⁰ yo' jech mu yanuc x'ajet ta sve'el ti alubel achamele.

¹¹ Yan mi mu jechuc une, xacha'na' xa liquel c'alal yantic xa xlubtsaj ti lum ach'el avu'une.

¹² Xachi xa ta xaval une: “¿C'u xa no'ox cha'al laj jbaj ti bijubtasele? ¿C'u no'ox cha'al laj jip laj jten ti tojobtasele?

¹³ ¿C'u no'ox cha'al mu'yuc laj cac' ta venta sc'op ti cajchanubtasvanejtaque? Mu'yuc laj jts'etan jchiquin ta ya'yiel sc'opic ti buch'u laj stojobtasicune.

¹⁴ Ta sba ta sat scotol ti jlumale, laj yilic ti juteb xa mu libat ta yoc yu'une.”

¹⁵ Ti taquin xa avo'nton ta yuch'el ti vo'e, uch'an ta ajoc' atuc.

¹⁶ Mu xamal ti ya'lel sat vo' avu'une; mu xavixtolan ta smalel ta bebetic.

¹⁷ Li joc' xchi'uc li vo'e, ja' avu'un, ma'uc yu'un yan; mu xa xavac' ta yan.

¹⁸ Col la'albat ti sat vo' avu'une, c'upinic ta stunesel xchi'uc ti achi'il ac'opojele.

¹⁹ C'upil sba stselet ta q'uelel ti uni te'tical chij avu'une, j'ech'eluc staucot ti c'usi xal avo'ntone, svolojucot ta j'ech'el ta syail xc'uxul yo'ntone.

²⁰ Cuni nich'on, ¿c'u cha'al ava'binoj aba ti yacbilot yu'un ti yan antse? ¿C'u cha'al ta xavac' aba ta q'uechel ta yan ants?

²¹ Ti Diose yac'oj ta venta c'u s'elan ta spas ti vinique; mu xch'ay sat bu ta xac' ech'el jujuteq'uel ti yoque.

²² Ti buch'u mu'yuc xch'ulel xa'i sbae, ta stsale yu'un ti c'usi chopol ta spase, co'ol s'elan jbejuc ch'ojon ta xchuque yu'un ti smule.

²³ Ti mu xac' ta venta ti tojobtasele, lajebal xa sq'ueloj batel; ta xch'ay ta be xchi'uc ti spimunebil ta j'ech'ele.